ترەمپ: ناڤالنی پیاوێكی ئازا بوو

ئاڤا نیوز

دۆناڵد ترەمپ، سەرۆکی پێشووی ئەمریکا ستایشی ئازایەتیی ئەلێکسی ناڤالنی کەسایەتی کۆچکردووی ئۆپۆزسیۆنی ڕووسیا دەکات و دۆخی خۆی بەو دەچوێنێت، دەشڵێت "ئەمریکا  خەریکە دەبێتە وڵاتێکی کۆمۆنیستی و تەنیا لەبەرئەوەی من لە ناو سیاسەتدا کار دەکەم دادگایی دەکرێم".

لێدوانی فەرميی: ترەمپ، لە میانەی چاوپێکەوتنێک لەگەڵ کەناڵی فۆکس نیوزی ئەمریکی، ڕایگەیاند: ناڤالنی پیاوێکی زۆر ئازا  بوو ،  ئەگەر نەگەڕایەتەوە بۆ ڕووسیا و لە دەرەوەی وڵات قسەکانی خۆی بکردایە، زۆر باشتر دەبوو .

ترەمپ سەبارەت بە سزادانی بە پێبژاردنی بڕی 355 ملیۆن دۆلار، خۆی بە ناڤالنی بەراورد کرد و گوتی: "شتی وەک ئەوە لە وڵاتی ئێمەش ڕوو دەدات، لە زۆر ڕووەوە خەریکە دەبینە وڵاتێکی کۆمۆنیستی، من هەشت یان نۆ دادگاییم هەیە و هەموو ئەوانەش لە بەر ئەوەیە کە لە ناو سیاسەتدام ".

زانیاریی زیاتر: پێشتر جۆ بایدن، سەرۆکی ئەمریکا و ژمارەیەک لە بەرپرسانی وڵاتانی ڕۆژئاوا، ڤلادیمیر پووتینی سەرۆکی ڕووسیایان بە بەرپرسیاری مردنی ناڤالنی زانی بوو.