نرخی ڤیزەی سووریا بۆ هاووڵاتییانی عێراق بۆ 250 دۆلار بەرزدەبێتەوە

ئاڤا نیوز

حکومەتی ڕاگوزەری سووریا نرخی ڤیزه‌ی وڵاتەکەی بۆ سەرجەم وڵاتانی جیهان دیاریكرد، بۆ هەڵگرانی پاسپۆرتی عێراقیش نرخەکەی بۆ یەکجار 250 دۆلارە‌.

وێنە گەورەکە: وه‌زاره‌تی ناوخۆی سووریا ئەمڕۆ پێنجشەممە 20-2-2025، خشتەیەکی نوێی ڤیزەی وڵاتەکەی بۆ سەرجەم وڵاتانی جیهان بڵاوکردەوە،  تەنیا هەڵگرانی پاسپۆرتی لوبنانی، ئوردنی ، مۆریتانی و مالیزی بەبێ ڤیزە و بەخۆڕایی دەتوانن گەشت بۆ سووریا بکەن، بەشێوەیەکی گشتیش سەرجەم نرخەکانی فیزەی وڵاتەکەی بەراورد بە ڕژێمی پێشوو بەرزکردووەتەوە.

ڕاگەیێنراوی فەرمی: به‌گوێره‌ی خشتەکە‌، كرێی ڤیزه‌ی چوونه‌ ژوره‌وە بۆ سووریا‌ بۆ هەر گەشتییارێکی عێراقی له‌ 50 دۆلاره‌وه‌ بۆ 250 دۆلار بەرزبووەتەوە، ئەم ڤیزەیەش تەنیا بۆ یەکجار بەکاردێت و دووای سێ مانگیش لەوەرگرتنی ئیکسپایەر دەبێت.

زانیاریی زیاتر: وه‌زاره‌تی ناوخۆی سووریا نرخی ڤیزەی ترانزێتی بۆ یەکجار و تەنیا بۆ ماوەی سێ ڕۆژ بۆ هەر هاووڵاتییەکی عێراقی بە 65 دۆلار دیاریکرد.