کۆمپانیاکانی حەج و عومرە تا یەک مانگی دیکە ناتوانن گەشتی عومرە ڕێک بخەن

ئاڤا نیوز

 

بەرێوەبەرایەتیی گشتی حەج و عومرەی هەرێمی کوردستان سەرجەم کۆمپانیا مۆڵەتپێدراوەکان ئاگادار دەکاتەوە کە نابێت ڕێکلام بۆ گەشتی عومرە بکەن، بەپێچەوانەوە ڕادەگیرێن و سزای دارایی دەدرێن.

 

وێنە گەورەکە: پێنج ڕۆژی دیکە گەشتی حەجخوازان بۆ سعودییە دەست پێدەکات، لەو ماوەیەدا چوونی عومرەکار بۆ ئەو وڵاتە قەدەغەیە تاوەکو کۆتایی پرۆسەکە، بەرێوەبەرایەتیی گشتیی حەج و عومرەی هەرێمی کوردستانیش ڕێککاری تووند بەرامبەر بەو کۆمپانیانە دەگرێتەبەر کە دەیانەوێت گەشتی عومرە ڕێک بخەن.

 

لێدوانی فەرمی: کاروان ستوونی، گوتەبێژی بەڕێوەبەرایەتیی حەج و عومرەی بە ئاڤای گوت، "تاوەکو یەک مانگی دیکە قەدەغەیە هیچ کۆمپانیایەک ڕێکلامی ڕێکخستنی گەشتی عومرە بکات، بەگوێرەی سەرپێچییەکە سزای دارایی دەدرێت و مۆڵەتەکەی لێوەردەگیرێتەوە."

 

ئەمەش بزانە: پێنج هەزار و 190 کەس بۆ حەجی ئەمساڵ ناویان گەڕاوەتەوە و بە هەردوو ڕێگەی وشکانی و ئاسمانی گەشتی سعودییە دەکەن.