ترەمپ، تۆماس باراک وەک نێردەی وڵاتەکەی لە سووریا دەناسێنێت

ئاڤا نیوز

 

ئەمریکا هەوڵدەدات پەیوەندی نوێ لەگەڵ سووریا بوونیادبنێت، بۆ ئەم مەبەستەش سەرۆکی وڵاتەکە نێردەی نوێی ئەمریکای بۆ سووریا  دیاریکرد.

 

بڵاوکراوەی فەرمی: دۆناڵد ترەمپ، سەرۆکی ئەمریکا لە پۆستێکیدا  لە تۆڕی کۆمەڵایەتیی ترووس سۆشیال ڕایگەیاند، بە خۆشحاڵییەوە ڕایدەگەیێنم کە تۆماس باراک باڵیۆزی ویلایەتە یەکگرتووەکانی ئەمریکا لە تورکیا وەک نێردەمان لە سووریا خزمەت دەکات.

 

لە درێژەی نووسراوەکەیدا ترەمپ دەڵێت، تۆماس توانایەکی گەورەی هەیە لە کارکردن لەگەڵ سووریا بۆ باشترکردنی پەیوەندییەکان و دەستەبەرکردنی ئاشتی لە ڕۆژهەڵاتی ناوەڕاست. پێکەوە، ئەمریکا و جیهان، دووبارە سەلامەت دەکەینەوە.

 

زانیاریی زیاتر: ئەم پێشهاتە لە کاتێکدایە، ئەمریکا بڕیاری هەڵگرتنی سەرجەم سزا سەپێنراوەکانی سەر سووریای دا، وڵاتانی جیهان و خودی سووریاش پێشوازییەکی گەرمی لەم  هەنگاوە کرد، وەزیری دەرەوەی ئەمریکا پاڵپشتیی واشنتنی بۆ سووریا دووپاتکردووەتەوە بەڵام لەگەڵ ئەمەشدا، هۆشداری دا لەوەی شکستهێنان ڕەنگە ببێتە هۆی شەڕی زیاتر و ناسەقامگیریی ناوچەکە.

 

باکگراوند: تۆماس باراکی تەمەن 78 ساڵ لە نیسانی ئەمساڵ لەلایەن ئەنجوومەنی پیرانی ئەمریکاوە وەک باڵیۆزی ئەمریکا لە تورکیا دەستنیشان کراوە، بەم بڕیارە نوێیەش دەبێتە نێردەی ئەمریکا لە دیمەشق.