عێراق وەڵامی ئەمریکا دەداتەوە و رەتیدەکاتەوە هەماهەنگی پێشوەختە کرابێت

هەواڵ
3 شوبات

شەیری بکە لە:

عێراق وەڵامی ئەمریکا دەداتەوە و رەتیدەکاتەوە هەماهەنگی پێشوەختە کرابێت

ئاڤا دیجیتاڵ

حکومەتی عێراق رەتیدەکاتەوە هەماهەنگی پێشوەختە کرابێت بۆ هێرشەکانی ئەمریکا و دەڵێت، ئەوە بانگەشەیەکی "درۆیە" بە ئامانجی چەواشەکردنی رای گشتی.

بۆچی گرنگە: ئەم لێدوانە دژیەکانەی ئەمریکا و عێراق سەرهەڵدانی ناکۆکییەکی نوێیە، لەکاتێکدا ئەو دوو وڵاتە دەستیان بە دانوستان کردووە بۆ کۆتاییهێنان بە ئەرکی هێزەکانی هاوپەیمانیی نێودەوڵەتیی دژی داعش و کشانەوەیان، مەترسی بەردەوامبوون و پەرەسەندنی گرژییەکانیش هەیە.

لێدوانی فەرمی: لە راگەیێنراوێکدا باسم عەوادی، گوتەبێژی حکومەتی عێراق ئاماژەی بەوە داوە: ئەمریکا "دەستدرێژییەکی" نوێی بۆ سەر سەروەری عێراق ئەنجامدا، بەوپێیەی هێزە ئەمنییەکانیانی لە ناوچەی عوکاشات، قائیم و شوێنە مەدەنییەکانی دەورووپشتی بە چەند فڕۆکەیەک بۆردوومانکردوون.

زیاتر بزانە: راگەیێنراوەکەی گوتەبێژی حکومەتی عێراقیدا ئاماژەی بەوەشکردووە هاوپەیمانیی نێودەوڵەتی لەو ئەرکانەی پێی سپێردراوە لایداوە، بووەتە هۆکارێک بۆ هەڕەشەکردن لە ئاسایش و سەقامگیری عێراق.

باکگراوند: شەوی رابردوو سوپای ئەمریکا زیاتر لە 85 بنکە و بارەگا و کۆگای چەک و تەقەمەنی گرووپە چەکدارەکانی نزیک لە ئێرانی لە عێراق و سووریا کردە ئامانج، بەهۆیەوە تەنیا لەعێراق 16 کەس کوژران و 25 کەسیش برینداربوون. ئەم هێرشە لە کاردانەوەی هێرشە درۆنییەکەی بەرەی مقاوەمەی ئیسلامی بوو بۆ سەر بنکەی سەربازیی تەنەف لە ئوردن، کە کوژرانی سێ سەرباز و برینداربوونی 40ی دیکەی لێکەوتەوە.

ئەوەی پێشبینی دەکرێت: دوای ئەم هێرشەی ئەمریکا، چاوەڕوان دەکرێت دووبارە گرووپە چەکدارەکان دەست بە هێرشەکانیان بکەنەوە دژ بە بنکەکانی ئەمریکا، کە پێشتر رایان گرتبوو.