هەرێمی کوردستان چوارەم هاوردەکاری کاڵاکانی ئێرانە

ئاڤا نیوز

پەیوەندییە بازرگانییەکانی هەرێمی کوردستان و ئێران لە گەشەسەندان و قەبارەی بازرگانیی نێوانیان بۆ نزیکەی حەوت ملیار دۆلار بەرزبووەتەوە.

وێنە گەورەکە: کۆماری ئیسلامیی ئێران لە پلەی دووەمی ئەو وڵاتانە دێت کە زۆرترین قەبارەی بازرگانی لەگەڵ هەرێمی کوردستان هەیە، زۆرینەی ئەو کاڵایانەی هاوردە دەکرێن پێکهاتوون لە خواردەمەنی، جلوبەرگ، کەرستەی بیناسازی و ئامێری کارەبایی.

لێدوانی فەرمی: مستەفا شێخ عەبدولڕەحمان، سەرۆکی یەکێتیی هاوردە و ناردنکارانی هەرێمی کوردستان بە ئاڤا نیوزی گوت، "ساڵانە قەبارەی بازرگانیی نێوان هەرێمی کوردستان و ئێران بۆ نزیکەی حەوت ملیار دۆلار بەرزبووەتەوە، هەرێمی کوردستان لە ڕیزبەندی چوارەمی ئەو وڵاتانە دێت کە زۆرترین کاڵا لە ئێران هاوردە دەکات."

زانیاریی زیاتر: زۆرینەی کاڵاکان لە دەروازەکانی حاجی ئۆمەران و باشماخەوە هاوردەی هەرێمی کوردستان دەکرێن، پەروێزخانیش یەکێک لە دەروازە سنوورییە گەورەکانە، بەڵام 40%ی ئەو کاڵایانەی لەو دەروازەیە  هاوردە دەکرێن ڕەوانەی پارێزگاکانی عێراق دەکرێن.

ئەوەی پێویستە بیزانیت: مەسعود پزیشکیان، سەرۆککۆماری ئێران ئێستا بە سەردانێکی فەرمی لە هەولێرە، یەکەمین سەرۆککۆماری ئێرانە سەردانی هەرێمی کوردستان دەکات و دوای ئەم سەردانە، لە سەرجەم ڕووەکانەوە پەیوەندییەکانی هەردوولا زیاتر بەرەوپێش دەچن.