بەرەی مقاوەمە لە عێراق بە درۆن هێرش دەکاتە سەر ئیسرائیل

ئاڤا نیوز

بەرەی مقاوەمەی عێراق دژی هێرشە بەردەوامەکانی ئیسرائیل بۆ سەر غەززە، بە ژمارەیەک درۆنی بۆمبڕێژکراو هێرش دەکاتە سەر بنکەکانی ئیسرائیل لە بەرزاییەکانی جۆڵان.

وێنە گەورەکە: دوای تێوەگلانی حیزبوڵڵای لوبنان لە شەڕی غەززە، ئێستا مەترسی هەیە گرژییەکان زیاتر فراوانبن و گرووپی چەکدار و وڵاتی زیاتر لە شەڕەکەوە بگلێن. سوپای ئیسرائیل هەڕەشە لە عێراق و ئێران و یەمەن دەکات و دەڵێت  کار لە هەموو بەرەکانی جەنگ دەکەن. 

ڕاگەیێنراوی فەرمی: بەرەی مقاوەمەی عێراق کە ژمارەیەک گرووپی چەکداری نزیک لە ئێران لەخۆدەگرێت، ڕایگەیاند: شەوی ڕابردوو بە سوودوەرگرتن لە فڕۆکەی بێفڕۆکەوان بنکەی چاودێریی سوپای ئیسرائیلیان لە بەرزاییەکانی جۆڵان کردووەتە ئامانج. هەڕەشەی ئەوەشی کرد لە هێرشەکانیان بەردەوام دەبن.

لەلایەکی دیکەوە: سوپای ئیسرائیل ڕایگەیاند: بەرپەچی هێرشی فڕۆکە بێفڕۆکەوانەکانیان داوەتەوە، بە مووشەک خستوونیانەتە خوارەوە و هیچ زیانێکی گیانی نەبووە.

ئەمەش بزانە: بەیانی ئەمڕۆ سوپای ئیسرائیل 80 بنکەی حیزبوڵڵای لە باشوور و ڕۆژهەڵاتی لوبنان بۆردوومان کرد.