دەرماڵەی هاوسەر و منداڵ بۆ خانەنشینانی نوێی سەربازی نامێنێت

ئاڤا نیوز

لەمەودوا دەرماڵەی هاوسەر و منداڵ بۆ خانشینانی نوێی سەربازی خەرج ناکرێت، بڕیارەکە لە 1-1-2025 جێبەجێ دەکرێت، بۆ خانەنشینانی کۆنیش هێشتا هیچ بڕیارێک نەدراوە.

چیرۆکی سەرەکی: دەرماڵەی هاوسەر بڕەکەی 75 هەزار دینار و دەرماڵەی منداڵ کە بۆ هەر یەکێکیان 15 هەزار دینارە، لەمەودوا بۆ خانەنشینانی نوێی کەرتی سەربازی خەرج ناکرێت، واتا ئەوانەی سەر بە وەزارەتی پێشـمەرگەن و 1-1-2025 خانەنشین بوون، تاوەکو ئیستا مووچەیان بۆ نەبەستراوە و بڕیارە لەم مانگەوە بەشێکیان مووچە وەربگرن.

هۆکارە زانراوەکان: بەپێی ئەو زانیارییانەی لە بەڕێوەبەرایەتیی گشتیی خانەنشینی هەرێمی کوردستان بە ئاڤا دراون، بڕینی هەردوو جۆری دەرماڵەکە بەهۆی جێبەجێکردنی یاسای ژمارە 9ی خانشینی ساڵی 2014ی عێراقە، کە مووچەی خانەنشینانی سەربازیی هەرێمی کوردستان لەگەڵ عێراق هاوتا دەکرێت، بەهۆی ئەوەی لە عێراقیش ئەم دوو جۆرە دەرماڵەیە نییە، لە هەرێمی کوردستانیش نامێنێت.

زانیاری بەدەستهاتوو: ئەوانەی پێش 1-1-2025 خانەنشین بوون، دەرماڵەکانیان وەکو خۆی دەمێنێتەوە، جارێ لێیان نابڕدرێت و مووچەیان کەم نابێتەوە، تاوەکو بە هەماهەنگی نێوان هەولێر و بەغدا بڕیاری لەسەر دەدرێت.