جگە لە کارەبا و کەمی پارەی نەختینە، عێراق ڕووبەڕووی قەیرانێکی دیکە دەبێتەوە

ئاڤا نیوز

 

لە مانگی حوزەیرانی داهاتووەوە عێراق ڕووبەڕووی قەیرانی کەمئاوی دەبێتەوە و بە گوتەی وەزارەتی سەرچاوەکانی ئاوی عێراقیش: لەماوەی 80 ساڵی ڕابردوو تاوەکو ئێستا تووشی قەیرانی هاوشێوە نەبووین. 

 

وێنە گەورەکە: بەگوێرەی وەزارەتی سەرچاوەکانی ئاوی عێراق،  70% سەرچاوەی ئاوی عێراق لە وڵاتانی دراوسێیە، بەو پێیەی 50% لە تورکیا و 15% لەئێرانەوە و 5% لە سووریاوە دێت، ئەو بڕە ئاوە ساڵ بەساڵ کەم دەکات.

 

لێدوانی فەرمی: خالید شیمال، گوتەبێژی وەزارەتی سەرچاوەکانی ئاوی عێراق ڕایگەیاند، یەدەگی ئاوی عێراق لە دۆخێکی مەترسیداردایە و  نزمبوونەوەی ئاستی ڕووبارەکان و کەمبوونەوەی بەرچاوی ئاو مەترسییەکی گەورەی لەسەر کشتووکاڵ و تەندرووستی گشتی و سەقامگیری وڵات دروستکردووە.

 

چاره‌سه‌ره‌كان: پێشتر وەزیری سەرچاوەکانی ئاوی عێراق ئاشکرای کرد، لەگەڵ تورکیا ڕێککەوتوون ڕۆژانە 500 مەتر سێجا ئاو لە چرکەیەکدا بۆ ئاوی فوڕات بەرداتەوە.

 

ئەمەش بزانە: بەگوێرەی ڕاپۆرتە نێودەوڵەتییەکان، عێراق یەکێکە لە زەرەرمەندترین وڵاتان لەڕووی گۆڕانی ئاو و هەواوە، بەو هۆیەوە ڕووبەڕوووی قەیرانی کەمیی ئاو بووەتەوە و بە وتەی بەرپرسانی حکومەت ئەمساڵ عێراق بە هاوینێکی سەخت تێدەپەڕێت