بۆ جاری شەشەم بلینکن سەردانی رۆژهەڵاتی ناوەڕاست دەکات

ئاڤا نیوز

سبەی چوارشەممە ئەنتۆنی بلینکن، وەزیری دەرەوەی ئەمریکا  بۆ گفتوگۆکردن لەبارەی پرسی ئاگربەست لە غەززە سەردانی ڕۆژهەڵاتی ناوەڕاست دەکات و یەکەم وڵات دەچێتە میسر.

وێنە گەورەكە:  لەوەتەی بووەتە وەزیری دەرەوەی ئەمریکا لە ساڵی 2021، ئەمە جاری شەشەمە بلینکن سەردانی ڕۆژهەڵاتی ناوەڕاست دەکات و ئامانج لە سەردانەکەش بەگوتەی بەرپرسانی کۆشکی سپی، پرسی ئاگربەستی نێوان ئیسرائیل و حەماسە.

لێدوانی فەرمی: ماتیۆ میلەر، گوتەبێژی وەزارەتی دەرەوەی ئەمریكا ڕایگەیاند: بلینكن پرسی ئاگربەست و گەیاندنی هاوكاری مرۆیی بۆ غەززە ئامانجی سەردانەكەیەتی.

بۆچی گرنگە: ئەمریكا لە سەروبەندی هەڵبژاردندایە، ئەگەر بلینكن بتوانێت ئیسرائیل و حەماس ڕازی بكات ئاگربەست بكەن، دەبێتە یەكێك لە گەورەترین دەستكەوتەكان بۆ جۆ بایدن، سەرۆکی ئێستای ئەمریکا  تا بتوانێت لە بانگەشەی هەڵبژاردنەكاندا بەكاریبهێنێت.