ئێران و ئەمریکا لەسەر وادەی دانوستانەکان ناکۆکن

ئاڤا نیوز

 

هەریەکە لە ئەمریکا و ئێران لەسەر وادەی بەڕێوەچوونی گەڕی شەشەمی دانوستانە ئەتۆمییەکانی نێوانیان ناکۆکن، لایەنی ئێران دەڵێت؛ یەکشەممە و لایەنی ئەمریکی دەڵێت؛ پێنجشەممە.

 

وێنە گەورەکە: واشنتن و تاران پێنج گەڕی دانوستانی ناڕاستەوخۆیان ئەنجامداوە و هەردوولا دەرئەنجامی دانوستانەکانیان بە ئەرێنی و بەرهەمدار وەسف کردووە، بڕیاربوو لەسەر دانوستانەکانیان بەردەوام بن، بەڵام تاوەکو ئێستا نەگەیشتوونەتە ڕێککەوتن بۆ بەڕێوەچوونی شەشەم خولی دانوستانە ئەتۆمییەکان.

 

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند: پێنچشەممەی داهاتوو گەڕێکی دیکەی دانوسانەکانی ئەمریکا و ئێران بەڕێوەدەچێت.

 

لەلایەکی دیکەوە: ئیسماعیل بەقائیی، وتەبێژی وەزارەتی دەرەوەی ئێران ڕایگەیاند: ڕۆژی یەکشەممەی داهاتوو شەشەم گەڕی دانوستانەکان لە شاری مەسقەت بەڕێوەدەچێت.

 

ئەوەی پێویستە بیزانیت: ڕۆژی دووشەممە 9-6-2025، ئێران ڕایگەیاند، بەم زووانە پێشنیازێکی نوێی  خۆی بۆ ڕێککەوتنی ئەتۆمی لەگەڵ ئەمریکا دەخاتەڕوو، دوای ئەوەی پێشنیارەکەی واشنتۆنی بە "ناڕوونی" وەسف کرد.