سووریا کردنەوەی دەروازەی ئەلبوکەمال بەڕووی عێراق ڕادەگەیێنێت

ئاڤا نیوز

دەستەی گشتیی دەروازە وشکانی و دەریاییەکانی سووریا، کردنەوەی دەروازەی سنووریی ئەلبوکەمال لەگەڵ عێراق بۆ هاتووچۆی گەشتیاران و بارهەڵگرەکان ڕادەگەیێنێت.

 

چیرۆکی سەرەکی: دەستەی گشتیی دەروازە سنووریەکانی سووریا، لە ڕۆژی 2ی ئەم مانگە ڕایگەیاندبوو، ڕۆژانی پشووی جەژنی قوربان بەشێک لە دەروازە سنووریەکانی لەگەڵ وڵاتانی دراوسێ دادەخات.

 

ڕاگەیێنراوی فەرمی: بەگوێرەی ڕاگەیێنراوی دەستەی گشتیی دەروازە وشکانی و دەریاییەکانی سووریا لە ڕۆژی شەممەی داهاتووەوە کە دەکاتە 2025-6-14 دەروازەی سنووریی ئەلبوکەمالی لەگەڵ عێراقدا بۆ هاتووچۆی گەشتیاران و بارهەڵگرەکان دەکرێتەوە.

 

لە هەمان کاتدا: دەستەکە جەخت لە ئامادەیی ستافەکانیان و سەرجەم دامەزراوە خزمەتگوزارییەکان لە دەروازەکەدا دەکاتەوەو و داوا لە گەشتیار و شۆفێرانی بارهەڵگر دەکات پابەندی ڕێنمایی و ڕێکارە پەسەندکراوەکان بن بۆ دڵنیابوون لە ئاسانکردنی هاتووچۆ و سەلامەتیی پەڕینەوە.

 

ئەوەی پێویستە بیزانیت: بەر لە جەژنی قوربان دەستەکە ئەوەشی ڕایگەیاندبوو کە ڕۆژانی پشووی جەژنی قوربان سەرجەم دەروازە سنوورییە وشکانیەکانی سووریا لەگەڵ تورکیا دادەخرێن،  هاوکات دەروازە سنوورییەکانی لەگەڵ لوبنان و ئوردن بەکراوەیی دەمێنێتەوە.