ئیسرائیل باڵەخانەی وەزارەتی بەرگریی ئێران دەکاتە ئامانج

ئاڤا نیوز

 

سوپای ئیسرائیل ڕایگەیاند، ژمارەیەک باڵەخانە وەزارەتی بەرگریی ئێرانیان کردووەتە ئامانج.

 

وێنە گەورەکە: ئێران و ئیسرائیل بەردەوامن لە هێرشەکانیان بۆ سەر یەکدی. ئیسرائیل، پێگە و بنکەی سەربازی و کۆگای سووتەمەنی و ژمارەیەک سەرکردەی باڵای سوپای پاسدارانی کردووەتە ئامانج، هەر ئەوەش نا، ئیسرائیل کێڵگەیەکی گاز و کۆگای سووتەمەنی ئێرانیشی کردووەتە ئامانج. لەبەرامبەردا ئێران بە مووشەک و درۆن دوو شەوە لەسەریەک ئیسرائیل بۆردوومان دەکات.

 

لێدوانی فەرمی: سوپای ئیسرائیل بڵاویکردەوە، کاتژمێر 2:40 خولەکی بەرەبەیانیی ئەمڕۆ هێزی ئاسمانیی وڵاتەکەی هێرشێکی ئاسمانیی لەسەر بنەمای زانیاریی هەواڵگری سەرکەوتووی بۆ سەر ژمارەیەک ئامانج لە تاران ئەنجامداوە، کە تایبەت بوون بە پرۆژەی ئەتۆمیی ئێران."

 

لە ڕاگەیێنراوەکەی سوپای ئیسرائیلدا هاتووە، لەو هێرشانەدا چەند باڵەخانەیەکی تایبەت بە وەزارەتی بەرگریی ئێران کراونەتە ئامانج. کە بەگووتەی بەرپرسانی ئیسرائیل ئەو شوێنانە یارمەتیدەری هەوڵەکانی ئێران بوون بۆ دەستڕاگەیشتن بە چەکی ئەتۆمی.

 

ئەوەی پێویستە بیزانیت: تا ئێستا نازانرێت زیانە گیانی و ماددییەکان چین.