ئیسرائیل ناوەندێکی گرنگی ئێران بەئامانج دەگرێت

ئاڤا نیوز

 

شەوی ڕابردوو جارێکی دیکە ئیسرائیل هێرشێکی فراوانی کردە سەر چەند دامەزراوەیەکی ئێران، هێرشەکانی ئەمجارە دامەزراوەکانی نەوت و بەرگری ئێرانی بە ئامانج گرت.

 

وێنە گەورەکە: سێ ڕۆژە شەڕ و پێکدادانی ڕاستەوخۆ لەنێوان ئیسرائیل و ئێران بەردەوامە، لەو ماوەیەشدا بەشێک لە دامەزراوەکانی ئێران لەلایەن ئیسرائیلەوە کراونەتە ئامانج. 

 

ڕاگەیێنراوی فەرمی: وەزارەتی نەوتی ئێران ڕایگەیاند، شەوی ڕابردوو پاڵاوگە و کۆگای نەوتی شەهران و چەند پاڵاوگەیەکی دیکە لە تاران کراونەتە ئامانج،  هاوکات لە پارێزگای بوشەهری باشووریش، ئیسرائیل دوو کێڵگەی غازی بۆردومانکردووە.

 

- هێرشەکەی شەوی ڕابردووی ئیسرائیل، بارەگاکانی وەزارەتی بەرگری ئێرانیشی لە تاران بە ئامانج گرت و زیانی بە بەشێک لە نووسینگەکانی گەیاند، لەوانەش نووسینگەی داهێنان و توێژینەوەی سەربازی.

 

لەلایەکی دیکەوە: سوپای ئیسرائیل دەڵێت، ئەو شوێنانەی شەوی ڕابردوو بۆردوومانیان کردوون، پەیوەندییان بە بەرنامەی ئەتۆمی ئێرانەوە هەبووە و لەم بوارەدا بەکارهێنراون.