هێڵی ئاسمانی عێراق: لە هەفتەیەکدا زیاتر لە 23 هەزار کەسمان گەڕاندووەتەوە

ئاڤا نیوز

کۆمپانیای هێڵی ئاسمانی عێراق ڕایگەیاند، لە ماوەی هەفتەیەکدا 74 گەشتیان لە فڕۆکەخانەکانی جیهانەوە بۆ وڵات ئەنجامداوە و بەهۆیەوە زیاتر لە 23 هەزار گەشتیارییان گەڕاندووەتەوە.

وێنە گەورەکە: لەگەڵ یەکەم ڕۆژی هێرشەکانی ئیسرائیل بۆ سەر ئێران، ئاسمانی عێراق بە ڕووی زۆرینەی گەشتەکاندا داخرا ئەوەش جگە لە زیانە مادییەکان، بووە هۆی گیرخواردنی هەزاران عێراقی کە لە فڕۆکەخانەکانی جیهان بەنیازی گەڕانەوە بوون.

ڕاگەیێنراوی فەرمی: کۆمپانیای هێڵی ئاسمانی عێراق ڕایگەیاند، لەماوەی حەوت ڕۆژدا لە فڕۆکەخانەکانی جیهان بەگشتی و بەشێوەیەکی سەرەکی لە فڕۆکەخانەکانی بەیروت، ئیستەنبووڵ، ئەنتالیا، دوبەی و قاهیرە 74 گەشتیان ئەنجامداوە و بەهۆیەوە 23 هەزار و 157 عێراقی و ڕەوەندی عەرەبی و بیانییان لە ڕێگەی فڕۆکەخانەی نێودەوڵەتی بەسرەوە گەڕاندووەتەوە.

ئەوەشی خستووەتەڕوو، هەموو ئەوانەشی لە بەیروت و تورکیان و دەیانەوێت بگەڕێننەوە، پێویستە پێش کۆتایی ئەم مانگە تکتی فڕۆکە ببڕن تا لەناو خشتەی گەشتەکاندا شوێن بگرن و بگەڕێنرێنەوە.