زانیاریی ئاڤا: پڕكردنەوەی فۆرمی ئەلیكترۆنیی خۆراک تا سەرەتای مانگی داهاتوو درێژكرایەوە

ئاڤا نیوز

بەڕێوەبەری گشتیی بازرگانی لە وەزارەتی بازرگانی و پیشەسازیی هەرێمی كوردستان تایبەت بە ئاڤا ڕایدەگەیەنێت، پڕكردنەوەی فۆرمی ئەلیكترۆنی پسووڵەی خۆراک لە هەرێمی كوردستان، بەفەرمی تاوەكو سەرەتای مانگی داهاتوو درێژكرایەوە.

 

وێنە گەورەكە: سبەی شەممە 5ـی تەمموزی 2025، دوا وادەی دیاریكراوە بۆ پڕكردنەوەی فۆرمی ئەلیكترۆنی پسووڵەی خۆراک كە بۆ ماوەی مانگێک بەردەست بوو، بەڵام بەڕێوەبەرایەتیی گشتیی بازرگانیی هەرێمی كوردستان بەهەماهەنگی لەگەڵ وەزارەتی بازرگانیی عێراق، ڕێككەوتنیان كرد بە درێژكردنەوەی ماوەكە تاوەكو 1-8-2025.

 

لێدوانی فەرمی: نەوزاد شێخ كامیل، بەڕێوەبەری گشتیی بازرگانی لە هەرێمی كوردستان تایبەت بە ئاڤا ڕایگەیاند، دوای ڕێككەوتنمان لەگەڵ وەزارەتی بازرگانیی عێراق، ڕەزامەندی درا بەوەی ماوەی پڕكردنەوەی فۆرمی ئەلیكترۆنی خۆراك لە هەرێمی كوردستان، تاوەكو 1ـی ئاب درێژبكرێتەوە، هاوشێوەی سەرجەم پارێزگاكانی دیكەی عێراق، بۆیە تا ئەو وادەیە مۆڵەت بە هاووڵاتیان دراوە ئەو فۆرمە پڕبكەنەوە.

 

باكگراوند: لە كۆتایی ساڵی ڕابردووەوە، دەستكراوە بە گۆڕینی پسووڵەی خۆراكی مانگانەی هاووڵاتیان لە سەرجەم پارێزگاكانی عێراق لە شێوازی كاغەزە بۆ ئەلیكترۆنی، پرۆسەكە قۆناغی زۆری بڕیوە و لە زۆرێك لە پارێزگاكان بەكۆتایی هاتووە و لە بەشێك لە پارێزگاكانی دیكەش گەیشتووەتە قۆناغی كۆتایی.