لە بەشێک لە شارەکانی عێراق نرخی سەهۆڵ سێ هێندە بەرزبووەتەوە

ئاڤا نیوز

 

لەگەڵ بەرزبوونەوەی پلەکانی گەرما، خواستی کڕینی هاووڵاتیان بۆ کڕینی سەهۆڵ زیاد دەکات، لە بەشێکی پارێزگاکانی باشووری عێراقیش نرخی قالبێک سەهۆڵ سێ هێندە بەرزبووەتەوە و حکومەتیش هەڵمەتێکی بۆ ڕێگریکردن لەقۆرخکاری دەستپێکردووە.

 

چیرۆکی سەرەکی: بەهۆی بەرزبوونەوەی پلەکانی گەرما، پچڕانی بەردەوامی كارەبای نیشتمانی، خواستی هاووڵاتیان بۆ سەهۆڵ زیادیکردووە بەو هۆیەوە نرخی قاڵبێك سەهۆڵ لە سەماوە لە هەزار دینارەوە بۆ سێ هەزار دینار بەرزبووەتەوە .

 

لێدوانی فەرمی: عودەی ئەعرەجی، قائیمقامی سەماوە سەنتەری پارێزگای موسەننا، ڕایگەیاند: بۆ ڕێگریکردن لە بەرزبوونەوەی نرخی سەهۆڵ بەهاوکاری بەڕێوەبەرایەتیی بەرەنگاربوونەوەی تاوانی ڕێکخراو هەڵمەتێکی هاوبەش بۆ چاودێریکردنی نرخی سەهۆڵ ئەنجام دەدرێت.

 

زانیاریی زیاتر: ئەعرەجی ئاماژەی بەوەکرد، حکومەت نرخی قالبێک سەهۆڵی لە نێوان 1250 بۆ 1500 دینار دیاریکردووە، هەر کەس لەو بڕە پارەیە زیاتر بیفرۆشێت قۆرخکاری دادەنرێت.

 

ئەمەش بزانە: بەگوێرەی هاووڵاتییان هەڵمەتەکەی حکومەت، قەیرانی سەهۆڵی لێکەوتووەتەوە و خەڵکی ناچارن لەدەرەوەی کارگەکان بە سێ هەندەی نرخەکەی پێشوو بیکڕن.