هەزار قوتابخانە لە عێراق دروست دەکرێن و ناوچە دابڕێنراوەکانیش دەگرێتەوە

ئاڤا نیوز

وەزارەتی پەروەردەی حکومەتی عێراق، وادەی تەواوکردنی هەزار قوتابخانەی لە چوارچێوەی ڕێککەوتنێک لەگەڵ وڵاتی چین ڕاگەیاند، داواکراوە بەشێکی قوتابخانەکان لە هەرێمی کوردستان دروستبکرێن.

وێنە گەورەکە: بەگوێرەی ڕێککەوتنێک تاوەکو ئێستا 150 قوتابخانە دروست کراون، لە کۆتایی مانگی چوار ژمارەیان دەبێتە 250 قوتابخانە، بینای قوتابخانەکانیش 12، 18 و24 پۆلیی دەبن.

لێدوانی فەرمی: نەجوە کاکەیی، ئەندامی لیژنەی پەروەردە لە ئەنجوومەنی نوێنەرانی عێراق، بە ئاڤا نیوزی ڕاگەیاند: "ژمارەی قوتابخانەکان بەگوێرەی ڕێژەی قوتابییان بەسەر پارێزگاکاندا دابەش کراون، پارێزگای کەرکووک 44 قوتابخانەی بەردەکەوێت، بە نووسراوی فەرمی داوامان کردووە ئەم پڕۆژەیە پارێزگاکانی هەرێمی کوردستانیش بگرێتەوە."

ئەوەی پێویستە بیزانیت: لە قۆناغی یەکەمدا، لە مانگی نۆی ساڵی 2024 دا،  هەزار قوتابخانە تەواو دەکرێن، کە هۆکارێکی گرنگ دەبێت بۆ کۆتاییهێنان بە دوو دەوامی و سێ دەوامی.