قایمقامی هەولێر: 370 دووکان لە بازاڕی قەیسەری سووتان

ئاڤا نیوز

 

شەوی ڕابردوو ئاگر لە بازاڕی قەیسەریی هەولێر کەوتەوە، قایمقامی هەولێر دەڵێت، 370 دووکان سووتان، پارێزگاری هەولێریش دەڵێت سووتانی دووكانەكان بەشێكی "خەتای دووكاندارەكانە".

 

چیرۆکی سەرەکی: کاتژمێر 09:00ـی شەوی ڕابردوو ئاگر لە بازاڕی قەیسەریی هەولێر کەوتەوە و دوای زیاتر لە سێ کاتژمێر لەلایەن تیمەکانی بەرگریی شارستانییەوە کۆنترۆڵ کرا.

 

ئەوەی ئێستا ڕوودەدات: هەر دوای کۆنترۆڵکردنی ئاگرەکە دوو لیژنە بۆ دەستنیشانکردنی زیانەکان و لێکۆڵینەوە لە هۆکارەکەی پێکهێنراون و ڕاپۆرتێک لەمبارەیەوە ئامادە دەکرێت.

 

لێدوانە فەرمییەكان: نەبەز عەبدولحەمید، قایمقامی قەزای ناوەندی هەولێر بە ئاڤا نیوزی گوت: بەهۆی ئاگرەکەوە 370 دووکان سووتاون و شەش کەسیش برینداربوون و تاوەکو ئێستاش خەمڵاندنی زیانە ماددییەکان نەکراوە.

 

لەلایەكی دیكەوە: ئومێد خۆشناو لەناو بازاڕی قەیسەریی هەولێر ڕایگەیاند: ئەو لێپێچینەوانەی پێشوو بەهۆی سووتانی چەند بازاڕێكی دیكە دەستیپێكردووە بەردەوام دەبن، بەشێكی بۆ کەمتەرخەمی خاوەن دووكانەكانە و دووكانەكانیان داناخەن.

 

ئەوەی پێویستە بیزانیت: هێزە ئەمنییەکان لە دەروازەکانی بازاڕەکە و شوێنی ڕووداوەکە بڵاوەیان پێکراوە و بازاڕەکە داخراوە.