لە هێرشێكی ئیسرائیلدا سێ منداڵی كورد كوژران

ئاڤا نیوز

ئیسرائیل بەردەوامە لە هێرشەکانی بۆ سەر باشووری لوبنان، لە بۆردوومانەکانی ئەمڕۆشدا سێ منداڵی کوردی ئاوارە کوژران.

چیرۆکی سەرەکی: کاتێک سووریا دۆخی تێکچوو بەشێک لە دانیشتووانی ئەو وڵاتە ڕوویان کردە لوبنان و لە باشووری ئەو وڵاتە جێگیربوون، بۆ ئەوەی بەسەلامەتی بژین، بەڵام ئێستا بە هۆی بۆردومانەکانی سوپای ئیسرائیل مەترسی لەسەر ژیانیان هەیە.

ئەوەی پێویستە بیزانیت: ئاوارەکانی باشووری لوبنان خەڵکی عەفرینی ڕۆژئاوای کوردستانن زۆربەیان کوردن و نیشتەجێی ئەو ناوچانەن.

زانیاریی زیاتر: جانی 10ساڵ و محەممەدی حەوت ساڵ و خەلیلی 12 ساڵ کە هەرسێکیان ئاوارەی سووریان و کوردی ناوچەکانی عەفرینن لە هێرشی ئیسرائیل بۆ ناوچەی ئوم توت لەکاتی یاریکردندا کوژران.

لێدوانی فەرمی: لقی سندوقی منداڵانی نەتەوە یەکگرتووەکان (یونیسێف) لە لوبنان لە پۆستێکدا لە پلاتفۆرمی ئێکس نووسیویەتی:"کوشتنی سێ منداڵ لەهێرشێکدا  زۆر شتێکی ترسناکە".