یەکەم کۆبوونەوەی وڵاتانی پرۆژەی ڕێگەی گەشەپێدان لە ئیستەنبووڵ دەکرێت

ئاڤا نیوز

 

ئەمڕۆ یەکەم کۆبوونەوەی چوارقۆڵی پڕۆژەی ڕێگەی گەشەپێدان لەشاری ئیستەنبووڵ لە دۆڵمەباخچەلی دەکرێت.

 

وێنە گەورەکە: پڕۆژەی ڕێگەی گەشەپێدان لە چوارچێوەی ئەو یاداشتە 26 خاڵییەی نێوان  بەغدا و ئەنقەرەیە کە لە 22ـی نیسان لە دوای سەردانەکەی ڕەجەب تەیەب ئەردۆغان، سەرۆککۆماری تورکیا بە بەشداری قەتەر و ئیمارات لە بەغدا واژۆ کرا. 

 

لێدوانی فەرمی: عەبدولکەریم ئۆڕاڵئۆغلو، وەزیری گواستنەوەی تورکیا لە پەڕەی فەرمی وەزارەتەکەی ڕایگەیاند: لە چوارچێوەی ڕێککەوتنەکە هەنگاو بەرەو قۆناغێکی زۆر گرنگ دەنێین.

 

ناوەڕۆکی کۆبوونەوەکە: کۆبوونەوەکە بە بەشداری وەزیرانی گواستنەوەی نێوان تورکیا، عێراق و قەتەر لەگەڵ وەزیری وزە و ژێرخانی ئیمارات دەکرێت کە واژۆیان لەسەر یاداشتەکە کردووە، وردەکاری کارکردن لەسەر پڕۆژەی ڕێگەی گەشەپێدان دەخرێتەڕوو و  لە ساڵی 2025  پلان بۆ تەواوکردنی پڕۆژەکە دادەنرێت.

 

خاڵە ئەرێنییەکان: ئەو پڕۆژەیە بۆ گەورەکردنی قەبارەی بازرگانی ئەو چوار وڵاتەیە، لە هەمان کاتدا ڕێگای بازرگانیی نێودەوڵەتی نێوان تورکیا، ئاسیا و ئەوروپا دروست دەکات، ڕێگەیەکی پارێزراوی بازرگانی بوونیاد دەنێت.