تورکیا و میسر قەبارەی بازرگانیی نێوانیان بۆ 15 ملیار دۆلار بەرزدەکەنەوە

ئاڤا نیوز

 

دوای 12 ساڵ عەبدولفەتاح سیسی، سەرۆکی میسر سەردانی تورکیای کرد  و لەگەڵ ڕەجەب تەیب ئەردۆغان، سەرۆککۆماری تورکیا لە ئەنقەرە کۆبوونەوە.

 

وێنە گەورەکە: ئەم سەردانەی سیسی لە دوای سەردانەکەی مانگی شووباتی ئەردۆغان بۆ قاهیرە دێت. کاتێک دوای 12 ساڵ سەردانی ئەو وڵاتەی کرد و پەیوەندییەکانی بەرەو قۆناغێکی نوێی سیاسی برد. 

 

لێدوانی فەرمی: ڕەجەب تەیب ئەردۆغان سەرۆککۆماری تورکیا گوتی،  لە دوای سەردانەکەم بۆ قاهیرە قۆناغێکی وەرچەرخان لە پەیوەندی نێوان تورکیا و میسر دروست بووە و لەو کاتەوە، پەیوەندییە دیبلۆماسییەکانمان لە ئاستێکی بەرزدا هێشتووەتەوە.

 

لەلایەکی دیکەوە: عەبدولفەتاح سیسی سوپاسی هەوڵەکانی ئەردۆغانی کرد و خۆشحاڵی خۆی بۆ گەشەسەندنی پەیوەندییەکانی لەگەڵ تورکیا دەربڕی. 

 

بابەتە ستراتیژییەکە: قەبارەی بازرگانی نێوان هەردوو وڵات لە ماوەی 5 ساڵدا بۆ 15 ملیار دۆلار بەرزدەکرێتەوە.

 

ناوەڕۆکی کۆبوونەوەکە: پرسی گەیاندنی هاوکاریی بە خەڵکی غەززە، زیادکردنی ژمارەی گەشتیاران و کاری هاوبەش لە سێکتەرەکانی ئاسایش، گەشتیاری، پیشەسازی و وزە، لە خاڵە سەرەکییەکانی کۆبوونەوەکە بوو.