عێراق: 77 بارەگای حیزبە ئۆپۆزسیۆنەکانی ئێرانمان داخستووە

ئاڤا نیوز 

 

دەزگای ئاسایشی نیشتمانیی عێراق ڕایگەیاند، دەسەڵاتداران لە وڵات 77 بارەگای حیزبە کوردییەکانی ئۆپۆزیسیۆنی ئێرانیان داخستووە کە لە نزیک سنوورەکانی ئێران لە دیوی هەرێمی کوردستان بارەگایان هەبووە.

 

وێنە گەورەکە: عێراق و ئێران لە ئازاری ساڵی 2023وە ڕێککەوتنێکی ئەمنییان واژۆ کردووە، یەکێک لە خاڵەکانی ڕێککەوتنەکە تایبەتە بە دوورخستنەوەی هێزەکانی ڕۆژهەڵاتی کوردستان لە سنووری نێوان هەرێمی کوردستان و ڕۆژهەڵاتی کوردستان. هاوکات داماڵینی چەک لەدەست ئەو هێزانە.

 

لێدوانی فەرمی: قاسم ئەعرەجی، ڕاوێژکاری ئاسایشی نیشتمانیی عێراق لە میانی دیدارێکی تەلەڤزیۆنیدا لەگەڵ میدیای ئێران ڕایگەیاند: 77 بارەگای حیزبە کوردییەکانی ئۆپۆزیسیۆنی ئێرانیمان لە سنوورەکان داخستووە و بارەگاکانیشمان ڕادەستی فەرماندەیی پاسەوانی سنوور کردووە. 

 

زانیاریی زیاتر: بە گوتەی ئەعرەجی، ئەندامانی ئەو حیزبانەیان بۆ شەش کەمپ گواستووەتەوە، چوار کەمپ لە هەولێر و دوو کەمپیش لە سلێمانی، ئەم کارەشمان بە ئامانجی ئەو کردووە بە هەماهەنگی لەگەڵ نەتەوە یەکگرتووەکان ئەو کەسانەی بۆ وڵاتی سێیەم بگوازرێنەوە.