مانگی سووری عێراقی: بنکەی پێشوازی لە ئاوارە لوبنانییەکان ئامادەیە

ئاڤا نیوز

 

بە هۆی گرژییەکانی لوبنان، كۆمەڵەی مانگی سووری عێراقی ڕێککارەکانی پێشوازی لە ئاوارە لوبنانییەکان لە دەروازەی سنووریی قائیم لەگەڵ سووریا تەواو دەکات.

 

وێنە گەورەکە: ماوەی هەفتەیەکە سوپای ئیسرائیل دەستی بە هێرشێکی چڕ بۆسەر حیزبوڵڵای لوبنان کردووە، تاوەکو ئێستا زیاد لە 650 هاووڵاتی کوژراون  و سەروو  دوو هەزاریش بریندار بوون، دەیان هەزاری دیکەش ئاوارەی سووریا و وڵاتانی دیکە بوون. 

 

ڕاگه‌یێنراوی فه‌رمی: كۆمەڵەی مانگی سووری عێراقی ڕایگەیاند: تیمەکانیان چەندین بنکەیان بۆ پێشوازیی لە ئاوارە لوبنانییەکان لە دەروازەی سنووری قائیم لەگەڵ سووریا داناوە.

 

ئاماژەی بەوەشکرد، ئەو بنکانە وێستگەی پشوودانی لۆجستیکی بۆ خێزانە ئاوارەکان، بنکەی تەندروستی و کلینیکی پزیشکی تێدایە.

 

ئەوەش بزانە: چاوەڕوان دەکرێت بە سەدان خێزانی لوبنانی ڕوو لە عێراق بکەن، حکومەتیش بۆ ئەو مەبەستە چەندین ڕێککاری تایبەتی گرتووەتەبەر و ڤیزای هاتنەژوورەوەی بۆ لوبنانییەکان هەڵگرتووە.