لە عێراق سزای لە سێدارەدان بۆ پێنج بازرگانی ماددەی هۆشبەر دەردەکرێت

ئاڤا نیوز

لەسەر بازرگانیکردن بە ماددەی هۆشبەر، دادگەی ناوەندیی تاوانەکان لە عێراق سزای لە سێدارەدانی بۆ پێنج بازرگانی ماددەی هۆشبەر دەردەکات.

 

وێنە گەورەكە: دوای یەکلاکردنەوەی تۆمەتی بازرگانیكردن بە ماددەی هۆشبەر، دادگای ناوەندی تاوانەكانی عێراق، سزای لەسێدارەدانی بۆ پێنج تاوانبار دەركرد.

 

ڕاگەیێنراوی فەرمی: نووسینگەی ڕاگەیاندنی ئەنجوومەنی باڵای دادوەریی عێراق لە ڕاگەیێنراوێکدا ئاماژە بۆ ئەوە دەکات، ئەو تاوانبارانە بڕی 210 کیلۆ ماددەی هۆشبەر لە جۆری "ئەمفیتامین"یان پێ گیراوە.

 

پێدراوە ڕاستەکان: تۆمەتباران بەگوێرەی بڕگەكانی ماددەی (27-بڕگەی یەكەم) لە یاسای بەرەنگاربوونەوەی ماددە هۆشبەرەكان و كارتێكەرە عەقڵییەكان ژمارە 50ی ساڵی 2017 و ماددەکانی 47 و 48 و 49ی یاسای سزادانی عێراقی سزادراون.

 

ئەوەش بزانە: بەگوێرەی نوێترین ڕاپۆرتی ساڵانەی رێكخراوی لێبوردنی نێودەوڵەتی، دوای ئێران و سعودییە، عێراق سێیەم وڵاتی ڕۆژهەڵاتی ناوەڕاستە لە ڕووی زۆری ژمارەی جێبەجێكردنی سزاكانی لەسێدارەدان.