34 زیندانیی دیكە بە لێبوردنی تایبەت ئازاد كران

ئاڤا نیوز

34 زیندانیی كە نەخۆشیی كوشندەیان هەیە و دۆخی تەندروستییان باش نییە، بە بڕیاری لیژنەیەكی تایبەتی سەرۆكایەتیی هەرێمی كوردستان و بە لێبوردنی تایبەت ئازاد كران.

چیرۆكی سەرەكی: لیژنەیەکی تایبەت لە سەرۆکایەتیی هەرێمی كوردستان پێكهێنراوە بۆ تاوتوێكردنی بارودۆخی ناو زیندانەكان، بەتایبەت بۆ ئەو بەندکراوانەی كە نەخۆشیی کوشندەیان هەیە، دوای پشكنین لەلایەن تیمی تایبەتمەندەوە لە ماوەی ڕابردوو نزیكەی 20 زیندانی بە بڕیاری سەرۆكایەتیی هەرێمی كوردستان ئازاد كران، ئەمڕۆش 34 زیندانیی دیكە بە لێبوردنی تایبەت ئازاد كران.

لێدوانی فەرمی: ئیحسان عەبدولڕەحمان، بەڕێوەبەری گشتیی چاكسازییەكانی هەرێمی كوردستان بە ئاڤا نیوزی ڕاگەیاند: ئەمڕۆ بە لێبوردنی تایبەت 34 زیندانی لە چاكسازییەكانی هەرسێ پارێزگای هەولێر و سلێمانی و دهۆك ئازاد كران.

گوتیشی: ئازادكردنی ئەو زیندانییانە لە چوارچێوەی بڕیاری لیژنە تایبەتەكەی سەرۆكایەتیی هەرێمی كوردستانە و تاوانی زیندانییەكان جۆراوجۆرە لە هاتووچۆوە تیایاندایە تاوەكو تاوانی كوشتن.