لە عێراق  320 ملیار دینار لە پڕۆژەیەک بەهەدەر دەدرێت

ئاڤا نیوز

ئاڤا میدیا بەدواداچوون بۆ ئاشکرابوونی گەندەڵییەک لە عێراق دەکات کە زیاتر لە 320 ملیار دینار بۆ پڕۆژەیەک بەهەدەر دراوە.

وێنە گەورەکە: لە شاری دیوانییە پڕۆژەی نۆژەنکردنەوەی 42 گەڕەکی نیشتەجێبوون بە 320 ملیار دینار دەدرێتە کۆمپانیایەکی ئیسپانی، خەڵکەکەش خۆشی خۆیان دەردەبڕن، بەڵام دوای ئەوەی کارەکانی ئەم پڕۆژەیە زۆر دوادەکەوێت، دەرکەوت کە هیچ پرۆژەیەک نەدراوەتە هیچ کۆمپانیایێکی ئیسپانی، بەڵکو لەبری ئەوە دراوەتە گرووپێکی چەکدار.

زانیاریی تایبەت: کامێرای ئاڤا دەچێتە ناو گەڕەکی فورات و جامیعە لە شاری دیوانییە، شەقامەکان هێشتان خۆڵە و قیڕتاونەکراوە، هەروەها بۆڕیی زێراب و ئاوەڕۆیان بە دەبەی ترشیات دروستکردووە، سەری مەنهۆڵەکانیش بە سەبەتەی پلاستیک گرتووە.

ئەوەی پێویستە بیزانیت: ئەو گرووپە چەکدارەی ئەو پرۆژەیان وەرگرتووە ناوی "ئەنساروڵای ئەوفیاء"ـە، ئەندامێکی ئەنجوومەنی پارێزگای دیوانییەش دەڵێ، پڕۆژەی پردی نەسیجیش هەر بەم کۆمپانیا بەناو ئیسپانییە دراوە و هیچیشیان دیار نییە.