عێراق هەڵوێستی خۆی لەبارەی دانوستانەکانی ئەمریکا و ئێران دەردەبڕێت

ئاڤا نیوز

سەبارەت بە گەڕی دووەمی دانوستانی نێوان ئەمریکا و ئێران، وەزارەتی دەرەوەی عێراق هەڵوێستی خۆی ڕاگەیاندوو دەڵێت، دەبێت ناوچەکە لە گرژیی زیاتر دووربخرێتەوە بەپێچەوانەوە کاریگەری "کارەساتباری" لەسەر هەمووان دەبێت، جەختیش دەکاتەوە کە گفتوگۆ باشترین ڕێگایە بۆ یەکلاییکردنەوەی ناکۆکییەکان.

چیرۆکی سەرەکی: ئەمڕۆ لە ڕۆمای پایتەختی ئیتاڵیا، گەڕی دووەمی دانوستانەکانی نێوان ئەمریکا و ئێران بە نێوەندگیریی سەڵتەنەتی عومان بەڕێوەچوو، بەگوتەی پسپۆڕانیش بازارەکانی ئابووریی جیهان و دۆخی ناوچەکە بە دەرئەنجامی ئەم گفتوگۆیانەوە گرێدراون.

لێدوانی فەرمی: فوئاد حوسێن، وەزیری دەرەوەی عێراق لە ئەبوزەبی لەگەڵ خەلیفە شاهین ئەلمەرەر، وەزیری دەوڵەتی ئیمارات بۆ کاروباری دەرەوە کۆبووەوە و پەیوەست بە دانوستانەکانی ئەمریکا و ئێران ئەوەی خستەڕوو، گرنگە ڕێگری لە سەرهەڵدانی گرژیی لە ناوچەکەدا بکرێت، چونکە کاریگەری "کارەساتباری" لەسەر هەمووان دەبێت، بۆ ئەو مەبەستەش گرنگە "سیستمی هەماهەنگی ئەمنیی بەردەوام" بوونیاد بنرێت بەجۆرێک بەرژەوەندی هەمووان بپارێزێت.

زانیاریی زیاتر: فوئاد حوسێن وتیشی "گفتوگۆ باشترین بژاردەیە بۆ یەکلاییکردنەوەی ناکۆکییەکان و ڕێگریی لە گرژیی زیاتر،  گەشەپێدان و ئارامی سیاسیش بەبێ هێنانە کایەی ژینگەیەکی ئارام و پڕ لەئاسایش نایەتەدی."