فایلی خەڵک؛ بەشێک لە خانەوادەی شەهیدانی شەڕی داعش هەشت مانگە مووچەیان وەرنەگرتووە

ئاڤا نیوز

بەشێک لە خانەوادەی شەهیدانی شەڕی داعش، بەهۆی ڕاییکردنی مامەڵەکانیان، هەشت مانگە مووچەی شەهیدانەیان وەرنەگرتووە.

چیرۆکی سەرەکی: بەشێک لە خانەوادەی شەهیدانی شەڕی داعش کە ژمارەیان 146 شەهیدە بەهۆی نەگواستنەوەی دۆسیەکانیان لە وەزارەتی ناوخۆوە بۆ وەزارەتی شەهیدان، ماوەی هەشت مانگە مووچەیان وەرنەگرتووە. 

لێدوانی فەرمی: ئەحمەد مام ڕەسوڵ، بەڕێوەبەری گشتی خزمەتگوزاریی کەسوکاری شەهیدان بە ئاڤای وت: دۆسیەی ئەو شەهیدانە سەر بە بەرگری و فریاکەوتنن، لە وەزارەتی شەهیدان کاری لەسەر کراوە و داوا کراوە دۆسیەکانیان لە وەزارەتی ناوخۆوە بگوازرێتەوە بۆ وەزارەتی شەهیدان و هێشتا ڕێکارەکانی تەواو نەکراوە، بەو هۆیەوە لە مانگی نۆی ساڵی پارەوە مووچەیان بۆ خەرج نەکراوە.

زانیاریی زیاتر: بە نووسراوی ژمارە 2795 لە ڕێکەوتی 2025-02-24، ئەنجومەنی وەزیران نوسراوی ناردووە بۆ وەزارەتی دارایی، ڕۆژێک دواتر وەزیری دارایی نووسراوی ناردووە بۆ بەڕێوەبەری ژمێرکاری وەزارەت، لەو کاتەوە ئەوە دوو مانگ زیاترە لە بەڕێوەبەرایەتی ژمێرکاری نووسراوەکە نەهاتووەتەوە. ئاڤا هەوڵیدا لەگەڵ بەڕێوەبەرایەتی ژمێرکاری وەزارەتی دارایی قسە بکات، بەڵام وەڵامی پەیوەندییان نەدایەوە.