شاندێکی گەورەی کاسبکارانی عێراق و کوردستان دەچێتە واشنتن

ئاڤا نیوز

باڵیۆزخانەی ئەمریکا لە عێراق، سەرۆکایەتی شاندێکی 46 کەسی لە کاسبکاران و پیشەوەرانی هەرێمی کوردستان و عێراق دەکات بۆ بەشداریکردن لە لووتکەی ساڵانەی وەبەرهێنانی Select USA کە لە واشنتۆنی پایتەختی ئەمریکا، لە ماوەی نێوان 11 تا 14ـی ئەم مانگە بەڕێوەدەچێت.

بۆچی گرنگە: بەشداری شاندی هەرێمی کوردستان و عێراق لە لووتکەی ئەمساڵدا دەرفەتێکی گرنگە بۆ کاسبکاران و وەبەرهێنەران تاوەکو ڕاستەوخۆ پەیوەندی لەگەڵ بازاڕی ئەمریکادا دروست بکەن و هەلی وەبەرهێنان لە بوارە جیاوازەکاندا بدۆزنەوە.

ڕاگەیەندراوی فەرمی: بەگوێرەی ڕاگەیێنراوی باڵیۆزخانەی ئەمریکا "شاندەکە چەندین بواری جیاواز لەخۆدەگرێت، لەوانە: تەکنەلۆژیا، ئاسایشی سایبەر، گەشتوگوزار، میوانداری، خواردن و خواردنەوە، کشتوکاڵ، بیناسازی، وەبەرهێنان، دەرمانسازی، خانووبەرە، نەوت و گاز. ئەم فرەچەشنییە دەرخەری ئەو هەلە فراوانانەیە کە بۆ هاوکاری و وەبەرهێنان لە نێوان ویلایەتە یەکگرتووەکان و عێراقدا هەن".

ئەوەی پێویستە بیزانیت: بەگوێرەی باڵیۆزخانەی ئەمریکا "لووتکەی وەبەرهێنانی Select USA گەورەترین ڕووداوی تایبەتە بە هاندانی وەبەرهێنانی ڕاستەوخۆی بیانی لە ویلایەتە یەکگرتووەکان. لووتکەکە وەبەرهێنەرانی نێودەوڵەتی، نوێنەرانی ویلایەتەکان و حکومەتە خۆجێییەکان و بەرپرسانی حکومی کۆدەکاتەوە بۆ ئاسانکاری وەبەرهێنان لە ئابووری ئەمریکادا".

ئەمەش بزانە: Select USA  پرۆگرامێکی فەرمی حکومەتی ئەمریکایە کە لە ساڵی 2011ـەوە لەلایەن ئۆباماوە دامەزراوە و ئامانجی سەرەکی ڕاکێشان و هاندانی وەبەرهێنانی ڕاستەوخۆی بیانییە بۆ ناو ویلایەتە یەکگرتووەکانی ئەمریکا.