تەنها لە یەک ڕۆژدا پێنج هەزار فەرمانبەر خانەنشین دەکرێن

ئاڤا نیوز

تەنیا لە یەک ڕۆژدا پێنج هەزار کەس بەهۆی ئەوەی ڕێکەوتی لەدایکبوونیان لە مانگی حەوتە، خانەنشین دەکرێن.

وێنە گەورەکە: دوای جێبەجێکردنی بڕیاری خانەنشینی یەکگرتوو مانگانە فەرمانبەران و مامۆستایان خانەنشین دەبن، لە 1-7- 2025 نزیکەی پێنج هەزار کەس خانەنشین دەکرێن، مامەڵەی خانەنشینیش نزیکەی مانگێکی پێویستە.

ئەوەی پێویستە بیزانیت: تەنها لە ڕۆژێکدا پێنج هەزار فەرمانبەر پێکەوە تەمەنیان گەیشتە خانەنشینی، ئەویش لەبەرئەوەی بەشێکی زۆری خەڵکی هەرێمی کوردستان و عێراق، بەتایبەت ئەوانەی ڕێککەوتی لەدایکبوونیان کەوتۆتە ساڵانی پەنجاکان و شەستەکان و حەفتاکان، ڕێککەوتی لەدایکبوونیان یەکی حەوتە.

هۆکارە زانراوەکان: یەکەم سەرژمێریی زانستی و تەواو لە عێراق لە ساڵی 1957 کراوە، ئەو کاتە گرفتێک هاتووەتە پێش، بەشی زۆری هاونیشتمانیان ڕێککەوتی لەدایکبوونیان دیار نەبووە، بۆیە حکومەتی عێراق بە بڕیاری فەرمی بڕیاری داوە 1-7 بکرێتە ڕێککەوتی لەدایکبوونی ئەو خەڵکە، چونکە یەکی حەوت ناوەڕاستی ساڵە.

ساڵانی دواتریش ئەمە بووەتە نەریت، هەر کەسێک ئەگەر یادی لەدایکبوونی دیارنەبووبێت، یەکی حەوتیان بۆ داناوە.

ئەوەی لەوبارەیەوە دەگوترێت: بەهۆی ئەوەی فەرمانبەرێکی زۆر لەدایکبوونی یەکی حەوتە، یەکی حەوتیش خانەنشین دەبن، لەدایکبووانی ساڵی 1965، ژمارەیان نزیکەی پێنج هەزار فەرمانبەر و مامۆستایە، ئەو ژمارەیەمان لە بەڕێوەبەرایەتیی  گشتیی خانەنشینی وەرگرتووە.

بەڵام مەرج نییە هەموویان ئەم مانگە خانەنشین بن، چونکە بەپێی یاسای خانەنشینی عێراق فەرمانبەر و مامۆستایان ئەگەر ڕەزامەندی بەڕێوەبەری فەرمانگەکەی و وەزارەتەکەی وەربگرێت، ئەوا دەتوانێت شەش مانگ خانەنشینبوونی دوا بخات، ئەو شەش مانگەشی وەک خزمەت بۆ هەژمار دەکرێت. 

زانیاریی تایبەت: سەرچاوەیەک لە بەڕێوەبەرایەتیی خانەنشینی بە ئاڤای گوت، جگە لەو پێنج هەزار فەرمانبەرە، کۆتایی مانگی شەش دوو هەزار فەرمانبەر و مامۆستای دیکە خانەنشین کراون، واتا هەر لەم ماوەیەدا حەوت هەزار فەرمانبەر خانەنشین کراون.

ئەمە دووەم خانەنشینی بەکۆمەڵی فەرمانبەرانە، سەرەتای ئەمساڵیش کاتێک تەمەنی خانەنشینی کوردستان لەگەڵ عێراق هاوتا کرا و لە 63 ساڵ کرایە 60 ساڵ، زیاتر لە 27 هەزار فەرمانبەر پێکەوە خانەنشین کران.

ژمارەکان وادەڵێن: بەپێی داتاکانی بەڕێوەبەرایەتیی گشتیی خانەنشینی، بە کۆی گشتی لە سەرەتای ئەمساڵەوە 20 هەزار و 900 دۆسیەیان بۆ نێردراون، تاوەکو ئەمڕۆ 19 هەزار و 400 دۆسیەیان تەواو کردوون، لەو ژمارەیە تەنیا لەم دوو مانگە 14 هەزار و 257 خانەنشینی نوێ دۆسیەیان تەواو بووە، کاتێک مووچەی مانگی پێنج دابەش کرا، ئەوا  5 هەزار و 261ـیان یەکەم مووچەی خانەنشینی وەردەگرن، لەگەڵ مووچەی مانگی شەشیش ئەوانی تر.