داوای بانگهێشتکردنی سەرۆکوەزیران و وەزیری نەوتی عێراق بۆ پەرلەمان دەکرێت

ئاڤا نیوز

 

ژمارەیەک ئەندامی ئەنجوومەنی نوێنەرانی عێراق نووسراوێکیان واژۆ کردووە بۆ ئەوەی سەرۆکوەزیران و وەزیری نەوتی عێراق بانگهێشتی پەرلەمان بکرێن لەبارەی بەرزکردنەوەی نرخی بەنزین.

 

وێنە گەورەکە: پێشتر ئەنجوومەنی وەزیرانی عێراق بڕیاری دا نرخی لیترێک بەنزینی موحەسەن بۆ 850 دینار، بەنزینی سوپەریش بۆ هەزار و 250 دینار بەرزبکرێنەوە و بڕیارەکەش لە یەکی ئایاری 2024 جێبەجێ دەکرێت.

 

نووسراوی فەرمی: لە نووسراوێکدا داوا لە سەرۆکی ئەنجوومەنی نوێنەرانی عێراق کراوە هەریەک لە محەممەد شیاع سوودانی، سەرۆکوەزیرانی عێراق، حەییان عەبدولغەنی، وەزیری نەوت بانگهشتی پەرلەمان بکرێن، بۆ ئەوەی ڕوونکردنەوە لەسەر هۆکاری دوو جۆری بەنزین و ئەگەری زیادکردنی نرخی بەنزینی نۆرماڵیش بدەن.

 

لەلایەکی دیکەوە: تاوەکو ئێستا 17 پەرلەمانتار نووسراوەکەیان واژۆ کردووە، ئەو پەرلەمانتارانە پێیانوایە کە ئەم بڕیارەی ئەنجوومەنی وەزیران لەڕووی ئابوورییەوە بارگرانی بۆ سەر هاووڵاتیان دروست دەکات.