وەزارەتی دەرەوەی ئەمریکا نیو ملیۆن دۆلار بۆ دەزگای مین دابین دەكات

ئاڤا نیوز

دەزگای مینی هەرێمی کوردستان  ڕایگەیاند، لەگەڵ بەرپرسی ئۆفیسی(WRA) کۆبوونەتەوە و بەڵێنی داوە نیو ملیۆن دۆلار بۆ تیمی مین لابەرانی دەزگای مینی هەرێمی کوردستان دابین بکات.

وێنە گەورەکە: شاندی دەزگای گشتیی مین لە سویسرا لەگەڵ ناتالی وەزیر، بەرپرسی ئۆفیسی(WRA) کە  پەیوەست بە کەمکردنەوە و لابردنی چەکی سەر بەوەزارەتی دەرەوەی ئەمریکایە کۆبوونەوە، تاوتوێی گیروگرفتەکانی کاروباری مین لە عێراق و کوردستان کرا.

لێدوانی فەرمی: ئەو هاوکارییەی وەزارەتی دەرەوەی ئەمریکا دەتوانرێت بۆ بەکرێ گرتنی ئۆتۆمبێل بۆ تیمەکانی مین لابەری لە سەرجەم هەرێمی کوردستان بەکاربهێنرێت، چونكە بەهۆی نەبوونی ئۆتۆمبێل دەیان تیم ڕۆژانە ناتوانن بگەنە سەر کێڵگە مینەکان. عەلی عەبدولڕەحمان، ئەندامی شاندی دەزگای گشتیی مین لە سویسرا ئەوەی بە ئاڤا نیوز گوت.

ژمارەکان وادەڵێن: 42 تیمی مین لابەر لە سەرجەم پارێزگاکانی هەرێمی کوردستان هەن، کار لەسەر پاککردنەوەی 225 کیلۆمەتری چوارگۆشە دەکەن، کە بە ناوچەی سوور تۆمارکراوە، ئەو تیمانە بەم شێوەیە بەسەر پارێزگاکاندا دابەش بوون:-
هەولێر: 14 تیم 
سلێمانی: 12 تیم 
دهۆک: 10 تیم
ئیدارەی گەرمیان: 6 تیم