دوو ڕۆژە ڕێگەی کۆیە – هەولێر بەڕووی بارهەڵگران داخراوە

ئاڤا نیوز

 

قایمقامی کۆیە ئاماژە بەوە دەدات، بارگرانی زۆر کەوتووەتە سەر ڕێگەی کۆیە – هەولێر، بەهۆیەوە هاونیشتیمانییان ڕێگەکەیان داخستووە.

 

وێنە گەورەکە: لە سنووری قەزای کۆیە سێ ڕێگە پارێزگاکانی سلێمانی و هەڵەبجە و ئیدارەی گەرمیان بە هەولێر دەبەستێتەوە کە ڕێگەی هاتووچۆی بارهەڵگرەکانن، دووانیان بەهۆی کارکردن داخرابوون، ڕێگەی  کۆیە – هەولێر وەک تاکە ڕێگە مابووەوە، بەڵام ئەویش دوو ڕۆژە داخراوە.

 

کاریگەری و لێکەوتەکانی: بەهۆی داخستنی ئەو ڕێگەیە، دوو ڕۆژە هیچ بارهەڵگرێک لە پارێزگاکانی سلێمانی و هەڵەبجە و ئیدارەی گەرمیان بۆ هەولێر و بەپێچەوانەوەش تێنەپەڕیوە.

 

لێدوانی فەرمی: تارق حەیدەری، قایمقامی کۆیە بە ئاڤا نیوزی ڕاگەیاند، "ڕێگەی کۆیە – هەولێر یەک سایدە و بەهۆی هاتووچۆی بارهەڵگرانەکەوە بارگرانی زۆری کەوتووەتە سەر، ئەمەش کاردانەوەی دانیشتووانی ئەو سنوورەی لێکەوتووەتەوە و ڕێگەکەیان داخستووە".

 

لەلایەکی دیکەوە: هەستیار هەژار، پەیامنێری ئاڤا لە ئیدارەی ڕاپەرین ئاماژەی بەوە دا، کە سەرجەم شۆفێرانی  بارهەڵگر لە دەروازەی  کێلێ لە سنووری ئیدارەی ڕاپەڕین مانیانگرتووە و ئەمڕۆ نەچوونەتەوە سەر کارەکانیان.