ڕێکخراوی چاودێریی مافی مرۆڤ: داخستنی كەمپەكانی هەرێمی كوردستان ژیانی ئاوارەكانی شنگال دەخاتە مەترسییەوە

ئاڤا نیوز

 

ڕێکخراوی چاودێریی مافی مرۆڤ هۆشداری لەبارەی داخستنی کەمپی ئاوارەکانی هەرێمی کوردستان دەدات و پێی وایە داخستنی ئەو كەمپانە ژیانی ئاوارەكان دەخاتە مەترسییەوە.

 

وێنە گەورەکە: عێراق بڕیاری داوە تاوەکو 30ـی تەمووزی ئەمساڵ، سەرجەم کەمپەکان دابخات و بەشێک لە ئاوارەکانیش ئەو داوایە ڕەت دەکەنەوە.

 

ڕاپۆرتی فەرمی: ڕێکخراوی هیومان ڕایتس وۆچ لە ڕاپۆرتێکدا دەڵێت: "پلانی داخستنی کەمپی ئاوارەکان لە هەرێمی کوردستان لەلایەن عێراقەوە دەبێتە مەترسی لەسەر دانیشتووانی کەمپەکان کە خەڵکی شنگالن".

 

ئەمەش بزانە: ئەو ڕێکخراوە پێیوایە، تاوەکو ئێستا ئەو قەزایە نائارامە و ئەو خزمەتگوزارییانەیان نییە کە پێویستن بۆ گەرەنتیکردنی مافە ئابووری، کۆمەڵایەتی و کولتوورییەکانی هەزاران ئاوارە کە ڕەنگە بەمزووانە ناچار بکرێن بگەڕێنەوە.

 

هۆکارە زانراوەکان: بەهۆی هێرشی داعشەوە 80%ـی ژێرخانی شنگال و 70%ـی خانووەکانی وێران بوون، بەو هۆیەشەوە هێشتا 183هەزار لە خەڵکی شنگال ئاوارەن.

 

لەلایەکی دیکەوە: دیندار زێباری، ڕێکخەری ڕاسپاردە نێودەوڵەتییەکانی حکومەتی هەرێمی کوردستان بە ئاڤا نیوزی گوت، ئێمە پابەندین بە پڕەنسیپە نێودەوڵەتییەکان لەسەر بنەمای ئارەزوومەندانەی گەڕانەوەی ئاوارە و پەنابەران بۆ ناوچەکانیان، لەگەڵ داخستنی زۆرەملێی هیچ کەمپێکدا نین.