کۆمیسیۆنی عێراق تێبینییەکی دیکەی پارتی جێبەجێ دەکات

ئاڤا نیوز

 

کۆمیسیۆنی هەڵبژاردنی عێراق بڕیاری لەبارەی خوێندنەوەی ژمارەی پەنجەمۆری دەنگدەران دا و هەر دەنگدەرێک لە کۆی 10 پەنجەی لە کاتی دەنگدان، چوار پەنجەمۆری بخوێنێتەوە دەتوانێت دەنگ بدات.

 

وێنە گەورەکە: پێشتر کۆمیسیۆن بڕیاری دابوو دەبێت هاووڵاتیان لە کۆی 10 پەنجەی دەست، شەشیان پەنجەمۆریان بخوێنرێتەوە، ئەگەرنا بێبەش دەبن لە دەنگدان، پارتیش تێبینی لەسەر ئەمە هەبوو، داوای چارەسەرکردنی دەکرد.

 

لێدوانی فەرمی: خالید عەباس، بەرپرسی نووسینگەی دهۆکی کۆمیسیۆنی باڵای سەربەخۆی هەڵبژاردنەکانی عێراق بە ئاڤا نیوزی گوت: بڕیاری نوێی کۆمیسیۆن ئەوەیە کە ژمارەی پەنجەکان بۆ وەرگرتنی پەنجەمۆر لە شەشەوە بۆ چوار کەم کراوەتەوە، بۆ ئەوەی زۆرترین دەنگدەر بتوانێت بەبێ کێشە دەنگ بدات.

 

ئەوەی پێویستە بیزانیت: بەهۆی ئەو بڕیارەی پێشووی کۆمیسیۆنەوە، نزیکەی 400 هەزار دەنگدەر لە هەرێمی کوردستان بێبەش دەبوون لە مافی دەنگدان، هاوکات پارتی ڕایگەیاندبوو، لەم ژمارەیە 232 هەزاریان دەنگدەری پارتین.

 

زانیاریی زیاتر: ئێستا ئەو کەسانەی پەنجەمۆریان ناخوێنرێتەوە، دووبارە بانگ دەکرێنەوە بۆ وەرگرتنەوەی پەنجەمۆریان و کێشەی زۆرینەیان چارەسەر دەبێت.