نرخی مریشک بەرزدەبێتەوە و گۆشت دادەبەزێت

ئاڤا نیوز

بەڕێوەبەری سامانی ئاژەڵ لە هەرێمی کوردستان ڕایگەیاند، نرخی مرشک بەرزبووەتەوە. بەڵام نرخی گۆشت دادەبەزێت.

وێنە گەورەکە: هەرێمی کوردستان لەماوەی یەک ساڵدا پێویستی بە 146 هەزار تۆن گۆشتی مریشکە، بەڵام زیاتر لە 250 هەزار تۆن گۆشتی مریشک بەرهەم دەهێنرێت، زیاتر لە 100 هەزار تۆنی هەناردەی پارێزگاکانی عێراق دەکرێت.

لێدوانە فەرمییەکان: فیراس سدیق، بەڕێوەبەری سامانی ئاژەڵ لە هەرێمی کوردستان بە ئاڤا نیوزی گوت:" ئێستا کیلۆی مریشک بە سێ هەزار دینارە، بەم نرخەی ئێستا خاوەن کێڵگەکان زەرەر ناکەن کە پێشووتر ناچار بوون بە زەرەر بیفرۆشنەوە".

لە لایەکی دیکەوە: هۆگر عەلی، بەڕێوەبەری چاودێریی بازرگانیی هەولێر، بە ئاڤا نیوزی گوت: هەرچەندە نرخی گۆشتی مریشک بۆ هەر کیلۆیەک بە بەراورد بە پێشتر 750 دینار زیادی کردووە، بەڵام نرخی گۆشتی سوور بۆ هەر کیلۆیەک دوو هەزار تا دوو هەزار و 500 دینار کەمی کردووە.