پارێزگای هەولێر: ئەم هاوینە 10 هەزار مەتر سێجا ئاومان زیاد كردووە

 ئاڤا نیوز  

پارێزگای هەولێر ڕایگەیاند، ئەم هاوینە بۆ کەمکردنەوەی کەمئاویی گەڕەکەکان چەندین هەنگاویان گرتووەتەبەر، بەو هۆیەوە توانیویانە زیاتر لە 10 هەزار مەتر سێجا ئاو زیاد بکەن. 

وێنە گەورەکە: ساڵانە لە وەرزی هاویندا کێشەی کەمئاویی ڕووبەڕووی چەند گەڕەکێکی هەولێر دەبێتەوە، لە چەند ڕیگەیەکەوە هەوڵی کەمکردنەوەی کاریگەرییەکانی ئەو گرفتە دەدرێت. 

ڕاگەیێنراوی فەرمی: پارێزگای هەولێر ئەمڕۆ هەینی ڕایگەیاند: ئەم هاوینە چەندین چاکسازی لە بۆڕییەکانی ئاوی ئیفراز دوو و سێ کراون، بەمجۆرە پێش ئەو چاکسازییانە دەتوانرا 24 هەزار و 960 مەتر سێجا ئاو لە کاتژمێرێک بۆ ماڵان بنێردرێت، بەڵام دوای چاکسازییەکان ئەو بڕە زیادکرا بۆ 35 هەزار و 400 مەتر سێجا ئاو لە کاتژمێرێکدا، بەکۆی گشتی 10 هەزار و 400 مەتر سێجا ئاو بۆ گەڕەکەکانی هەولێر زیاد بووە. 

زانیاريی زیاتر: لەسەر بوودجەی پارێزگا 20 بیر و لەسەر ئەرکی خێرخوازان 11 بیر بۆ ئەو گەڕەکانە لێدراون کە کێشەی کەمئاوییان هەیە، 622 ملیۆن دینار بۆ پێداویستی چاککردنەوەی بیرەکان خەرج کراوە، هاوکات بەبڕی 367 ملیۆن دینار بە تانکەر ئاو دابین کراوەو کارەبای 300 بیریش بە مۆلیدەی گەڕەکەکان بەستراونەتەوە.