ئەردۆغان بڕیارێکی پەیوەندیدار بە خەڵکی هەرێمی کوردستان واژۆ دەکات

ئاڤا نیوز

ڕەجەب تەیب ئەردۆغان، سەرۆککۆماری تورکیا واژۆی لەسەر بڕیاری گۆڕانکاریکردن لە نرخی ڤیزەی هاووڵاتیانی هەرێمی کوردستان و عێراق کرد، بەوەی نرخی ڤیزە بۆ تەمەنی "خوار 15 ساڵ و سەرووی 55 ساڵ بێبەرامبەر "دەبێت. 

 

وێنە گەورەکە: ئەم بڕیارە لەدوای ئەوە دێت کە داواکاریی هاووڵاتیان بۆ وەرگرتنی ڤیزەی گشتیاری بۆ تورکیا بەرزبوونەوەی بەرچاوی بەخۆیەوە بینیوە، وڵاتەکەش وەک هەنگاوێک بۆ ئاسانکاری گەشتی هاووڵاتیانی هەرێمی کوردستان و عێراق گۆڕانکاری لە نرخی ڤیزەدا کرد بۆ تەمەنی دیاریکراوی 'خوار 15 ساڵ و سەرووی 55 ساڵ' بێبەرامبەرە. 

 

ڕاگەیێنراوی فەرمی: ڕۆژنامەی فەرمیی سەرۆکایەتیی تورکیا ڕایگەیاند، ئەمڕۆ ڕەجەب تەیب ئەردۆغان، سەرۆککۆماری تورکیا واژۆی لەسەر بڕیاری لابردنی ڤیزای هاووڵاتیانی کوردستان و عێراق کرد. بڕیارەکە لە 1-9-2024 دەچێتە بواری جێبەجێکردنەوە.

 

ناوەڕۆکی بڕیارەکە: ئەو هاووڵاتیانەی تەمەنیان کەمتر لە 15 ساڵ و سەرووی 55 ساڵ بێت، بەمەبەستی گەشتیاری سەردانی تورکیا بکەن، لە ماوەی هەر 180 ڕۆژێکی مانەوەیان وەک گەشتیار، 90 ڕۆژ لێخۆشبوونی ڤیزەیان پێدەدرێت. 

 

ئەوەی پێویستە بیزانیت: لە ماوەی 180 ڕۆژ (6 مانگ) بۆ ماوەی 3 مانگ (90 ڕۆژ) تەنها یەک جار دەتوانرێت لێخۆشبوونی ڤیزا بەکاربهێنرێت، لە ساڵێکدا دوو جار ئەو ڤیزایە بەکاردێت.

 

زانیاریی زیاتر: پارەی ڤیزای گەشتیاران بۆ تورکیا لە 130 دۆلار بۆ 200 دۆلارە، بەپێی مانەوەش بڕی پارەکە دەگۆڕێت.