هەرێمی کوردستان چاوی لە هاتنی 20 ملیۆن گەشتیارە

ئاڤا نیوز

 

لە ماوەی کابینەی نۆیەمی حکومەتی هەرێمی کوردستان دەیان پرۆژەی گەشتیاریی مۆڵەتیان وەرگرتووە. بڕیاریشە ساڵی 2025 ڕێبەرێکی ئەلیکترۆنی گەشتیاریی بەردەست بێت کە زانیاریی لەسەر ناوچە گەشتیارییەکان بە زمانەکانی کوردی، عەرەبی، ئینگلیزی لەخۆدەگرێت.

 

وێنە گەورەکە: کەرتی گەشتوگوزار پێدەنێتە قۆناغێکی نوێوە و ئەمەش کاریگەریی لەسەر هەمەچەشنکردنی سەرچاوەکانی داهات هەیە، هاوکات دەبێتە بنەمایەکی گرنگ بۆ بەهێزکردنی ژێرخانی ئابووری لە هەرێمی کوردستان.

 

لێدوانی فەرمی: سیروان تۆفیق، بەڕێوەبەری بەبازاڕکردن لە دەستەی گەشتوگوزار بە ئاڤا میدیای ڕاگەیاند: لە ماوەی کابینەی نۆیەمی حکومەتی هەرێمی کوردستاندا، داهاتی گەشتوگوزار 42٪ بووە  لە کەرتی تایبەت و زیاتر لە حەوت ملیار دۆلاریش داهاتی کەرتەکە بووە، لە پلانیشماندایە تاوەکو ساڵی 2030 ژمارەی گەشتیاران بگەیێنینە 20 ملیۆن گەشتیار. 

 

ئەوەی پێویستە بیزانیت: ئەمساڵ 28 پرۆژەی گەشتیاری مۆڵەتیان وەرگرتووە، سەرمایەکەیان 322 ملیۆن و 279 هەزار و 927 دۆلارە، ڕووبەرەکەیان نزیکەی 836 دۆنم زەوییە و ٪9.21 سەرمایەی سێکتەرەکان بۆ ساڵی 2024 پێکدەهێنێت.