وەزارەتی كارەبا: لە مانگی داهاتوو پێدانی كارەبای نیشتمانی زیاد دەکات

ئاڤا نیوز

 

وتەبێژی وەزارەتی كارەبای هەرێمی کوردستان ڕایگەیاند، لە مانگی دووی ئەمساڵەوە پێدانی كارەبا بەهاووڵاتییان زیاد دەکات. 

وێنە گەورەکە: ساڵی ڕابردوو ڕۆژانە حەوت بۆ 10 کاتژمێر کارەبا دراوە بە هاووڵاتییان، بەڵام لە مانگی داهاتووەوە بەرهەمهێنان و پێدانی کارەبا لە هەرێمی کوردستان زیاد دەبێت، بەمەش پێدانی کارەبا بە هاووڵاتییان زیاتر دەبێت.

لێدوانی فەرمی: ئومێد ئەحمەد، وتەبێژی وەزارەتی كارەبا بە ئاڤا میدیای ڕاگەیاند: ساڵی ڕابردوو بڕی پێدانی كارەبا لە هەرێمی كوردستان بەگشتی لە نێوان حەوت بۆ 10 کاتژمێر بووە و بڕەكەش بەگوێرەی پارێزگاكان گۆڕانکاری بەسەردا هاتووە.

ئەوەی پێویستە بیزانیت: ئەم مانگەش پێدانی كارەبای نیشتمانی هاوشێوەی ساڵی ڕابردوو دەبێت و لە سەرجەم پارێزگاکان هەر حەوت بۆ 10 کاتژمێر دەبێت، بەڵام لە مانگی داهاتووەوە پێدانی کارەبا زیاد دەبێت.

ئەمەش بزانە: مانگی دوو بەرهەمهێنانی كارەبا لە وێستگەی خورمەڵە 500 مێگاوات زیاد دەكات، بەو هۆیەشەوە كاتژمێرەكانی پێدانی كارەبا بە هاووڵاتییان زیاد دەکات.

 

گوتەبێژی وەزارەتی کارەبا دەڵێت: مانگی دوو سەعاتێک بۆ دوو سەعات، مانگی سێش سێ سەعات بۆ چوار سەعات پێدانی کارەبای نیشتمانی زیاد ئەکات.