بۆ پێکهێنانی کابینەی نوێ پارتی و بەرەی گەل لە هەولێر كۆبوونەوە

ئاڤا نیوز

 

لە چوارچێوەی هەوڵەكان بۆ پێكهێنانی كابینەی داهاتووی حكومەتی هەرێمی كوردستان، شاندی پارتی دیموكراتی كوردستان سەردانی بارەگای بەرەی گەلی لە شاری هەولێر كرد و لەگەڵ بەرپرسانی حیزبەكە كۆبوونەوە.

وێنە گەورەكە: پارتی دیموكراتی كوردستان وەك براوەی یەكەمی هەڵبژاردنی خولی شەشەمی پەرلەمانی كوردستان، بۆ پێكهێنانی كابینەی نوێی حكومەت لە سەردان و كۆبوونەوەكانی لەگەڵ سەركردەی پارتە سیاسییەكانی هەرێمی كوردستان بەردەوامە.

زانیاریی بەدەستهاتوو: ئەمڕۆ سێشەممە 14-1-2025 شاندێكی باڵای پارتی دیموكراتی كوردستان بە سەرۆكایەتیی هۆشیار زێباری، ئەندامی مەكتەبی سیاسیی، سەردانی بارەگای بەرەی گەلی لە شاری هەولێر كرد و لەلایەن لاهوور شێخ جەنگی، سەرۆكی بەرەکە پێشوازییان لێكرا.

راگەیێنراوی فەرمی: دوای کۆبوونەوەکە نووسینگەی لاهوور شێخ جەنگی ڕاگەیەندراوێکی بڵاوکردەوە و ڕایگەیاند، لەگەڵ شاندی پارتی بیروڕایان لەبارەی پرسی پێکهێنانی کابینەی داهاتووی حکومەتی هەرێمی کوردستان ئاڵوگۆڕ کردووە.

ئەمەش بزانە: بەرەی گەل دوو کورسی پەرلەمانی کوردستانی بەدەستهێناوە و هێشتا دیارنییە بەشداری حکومەت دەکات یان نا.