مورهەف ئەبو قەسرە: دۆسیەی هەسەدە یان بە دانوستاندن یان سەربازیی چارەسەر دەکەین

ئاڤا نیوز

 

وەزیری بەرگریی حکومەتی ڕاگوزەری سووریا ڕایدەگەیێنێت، دانوستاندن لەگەڵ هێزەکانی سووریا دیموکرات بەردەوامە و ئەو دۆسیەیە لای سەرکردایەتیی سووریایە، هەر ڕاسپاردەیەک لەلایەن سەرکردایەتیی سووریاوە بۆ ئێمە بێت، ئێمە ئامادەین جا بە دانوستاندن بێت یان سەربازیی چارەسەری ئەو پرسە بکەین.

 

وێنە گەوەرەکە: دانوستانی نێوان هێزەکانی سووریای دیموکرات 'هەسەدە' و ئیدارەی نوێی سووریا لەبارەی چارەنووس و داهاتووی هێزەکانی هەسەدە لە ئیدارەی نوێی سووریا بەردەوامە و هەسەدە ئامادەیی خۆی پیشانداوە وەک یەک کوتلە لەناو وەزارەتی بەرگریی سووریا بە پاراستنی تایبەتمەندیێتیان. بەڵام وەزیری بەرگریی لە حکومەتی ڕاگوزەری سووریا ئەو دەستپێشخەرییە ڕەتدەکاتەوە.

 

لێدوانی ڕۆژنامەوانی: مورهەف ئەبو قەسرە، وەزیری بەرگریی حکومەتی ڕاگوزەری سووریا لە چاوپێکەوتنێکی تەلەڤزیۆنیدا ڕایگەیاند: دانوستاندن لەگەڵ هێزەکانی سووریای دیموکرات بەردەوامە، ئێستا ئەو دۆسیەیە لەلای سەرکردایەتی سووریایە و ئەوان دانوستاندن دان و ئەو دۆسیەیە بەڕێوە دەبەن. ئێمە وەکو وەزارەتی بەرگریی هەر ڕاسپاردەیەکمان لەلایەن سەرکردایەتییەوە لەبارەی دۆسیەی هێزەکانی سووریای دیموکراتەوە بۆ ئێمە بێت، ئامادەین.

 

ئەوەی لەوبارەیەوە دەگوترێت: مورهەف بە دووری خستەوە هیچ پێکدادانێک لەنێوان هێزەکانیان و هێزەکانی سووریای دیموکرات ڕوویدابێت و ڕایگەیاند: ئێمە پابەندین بە بڕیارەکانی سەرکردایەتی، سەرکردایەتیش ئێستا لە سەروبەندی دانوستاندنەو و ڕەتیشیکردەوە کە هیچ ڕاسپاردەیەکیان لەلایەن سەرکردایەتییەوە پێگەیشتبێت لەبارەی بەکارهێنانی هێزی سەربازیی لە بەرامبەر هێزەکانی سووریای دیموکرات.

 

چارەسەرەکان: وەزیری بەرگریی لە حکومەتی ڕاگوزەری سووریا جەخت لەسەر  ئەوە دەکاتەوە کە وەک ئیدارەی سووریا نابنە مەترسی بۆ سەر ئاسایشی نەتەوەیی تورکیا و پەیوەست بە دۆسیەی هێزەکانی سووریای دیموکراتیش دەڵێت: "چارەسەرەکەی یان لە ڕێگەی دانوستاندن دەبێت یان لە ڕێگەی سەربازییەوە دەبێت".