ئەنجوومەنی دادوەری: لێبوردنی گشتی تاوانبارانی ڕفاندن و بەکەنیزەکردنی کچانی ئێزدی ناگرێتەوە

 

ئاڤا نیوز

ئەنجوومەنی باڵای دادوەریی عێراق دووپاتی دەکاتەوە، لێبوردنی گشتی ئەو چەکدارانەی ڕێکخراوی داعش کە تاوانبارن لە ڕفاندن و بەکەنیزەکردنی کچانی کوردی ئێزدی ناگرێتەوە.

چیرۆکی سەرەکی: 21ـی مانگی ڕابردوو پەرلەمانی عێراق یاساکانی باری کەسێتی، لێبوردنی گشتیی و گەڕانەوەی زەوییە کشتوکاڵییەکان بۆ خاوەنە ڕەسەنەکانی لە کەرکووک پەسەند کرد.

ڕاگەیێنراوی فەرمی: عەلی حسێن جەفات، سەرۆکی ناوەندی نیشتیمانی بۆ هاوکاریی دادوەریی نێودەوڵەتی کە سەر بە ئەنجوومەنی باڵای دادوەریی عێراقە ئاشکرای کرد، تاوانبارانی ڕفاندن و بەکەنیزەکردنی کچانی ئێزدی لێبوردنی گشتی نایانگرێتەوە و تەنانەت بە دوایین هەمواری یاساکەش کە لە ڕۆژی 2025-01-20، لەلایەن پەرلەمانەوە پەسەند کرا.

زانیاریی زیاتر: بەگوێرەی مادەی 9ـی یاسای کچانی ڕزگاربووی ئێزدی ژمارەی 8ـی ساڵی 2021، ئەنجامدەرانی تاوانی ڕفاندن و بەکەنیزەکردنی کچانی ئێزیدی هیچ لێبوردنێکی گشتی و تایبەت نایانگرێتەوە.

ئەوەی پێویستە بیزانیت: هاووڵاتیانی کوردی ئێزدی دژی پەسەندکردنی هەمواری یاسای لێبوردنی گشتی بوون، چەندین جاریش لە قەزای شەنگال خۆپیشاندانیان دژی هەموارەکە کرد.