پزیشکێکی تەندروستیی گشتی: زیادەڕۆیی لە خواردنەوە وزەبەخشەکان گورچیلەکان لەکار دەخات

ئاڤا نیوز

پزیشکێکی تەندروستیی گشتی هۆشداری لەبارەی کاریگەرییە مەترسیدارەکانی خواردنەوە وزەبەخشەکان لەسەر تەندروستیی گورچیلە دەدات.

چیرۆکی سەرەکی: د. سیرمید مەزهەر، پسپۆڕی تەندروستیی گشتی مەترسییە تەندروستییەکانی خواردنەوە وزەبەخشەکان ڕوون دەکاتەوە و دەڵێت زیادەڕۆیی لە خواردنەوەیان زیانی گەورەی لێ دەکەوێتەوە و چارەسەرکردنیشیان سەخت دەبێت.

ئەوەی پێویستە بیزانیت: خواردنەوە وزەبەخشەکان بەم سێ ڕێگە سەرەکییە زیان بە گورچیلەکان دەگەیێنن:

- بەرزبوونەوەی پەستانی خوێن: لەبەرئەوەی خواردنەوە وزەبەخشەکان ڕێژەیەکی بەرزی "کافاین"ـیان تێدایە، دەبنە هۆی بەرزکردنەوەی پەستانی خوێن بەشێوەیەکی بەرچاو، کە ئەمەش هۆکارە بۆ تێکچوونی بۆرییە بچووکەکانی خوێن لە گورچیلەدا.

- وشکبوونەوەی لەش: کافاین هۆکارە بۆ زۆر میزکردن، ئەمەش دەبێتە هۆی لەدەستدانی شلە لە لەشدا، قەرەبوو نەکردنەوەی ئەم لەدەستدانە بە خواردنەوەی بڕێکی پێویست لە ئاو لەوانەیە ببێتە هۆی ماندوێتی گورچیلە و سستی و لاوازبوونی کارەکانی.

- بەرزبوونەوەی ئاستی شەکر: زۆربەی خواردنەوە وزەبەخشەکان بڕێکی زۆر شەکریان تێدایە، کە ڕێژەی شەکر لە خوێندا بەرز دەکەنەوە، بەتایبەتی لەو کەسانەی مەترسیی تووشبوونیان بە نەخۆشی شەکرە هەیە، ئەمەش بارگرانی لەسەر گورچیلەکان زیاد دەکات.

لەلایەکی دیکەوە: توێژینەوەیەک لە ڕۆژنامەی " Medical Case Reports" بڵاوکراوەتەوە، تێیدا پشکنین بۆ ژنێکی ئەمریکیی تەمەن 62 ساڵ کراوە، کە زیادەڕۆیی لە خواردنەوە وزەبەخشەکاندا کردووە و دەرکەوتووە بەهۆیەوە گورچیلەکانی بەتووندی لەکارکەوتوونە و تووشی هەوکردنی تووندی جگەریش بووە.