ڕاوێژکارێکی سوودانی: 40%ی وەزیرەکان بارگرانین لەسەر حکومەت

ئاڤا نیوز

 

ڕاوێژکارێکی سەرۆکوەزیرانی عێراق ئاشکرای دەکات، زیاتر لە 40%ـی وەزیرەکانی حکومەتەکەی سوودانی بەهۆی خراپی ئەدای کارەکانیانەوە بارگرانییان لەسەر حکومەتی عێراق دروستکردووە.

 

وێنە گەورەکە: لە دوای ڕوخانی ڕژێمی سەدام حوسێن، لە 2003ـەوە حکومەتی عێراق بەشێوازی فرە لایەنی دادەمەزرێت و زۆربەی لایەنە شیعی و سوننە و کوردییەکان بەشداری تێدادەکەن، هەر لایەن و پارتێک کاندیدی خۆی بۆ پۆستەکانی حکومەت دیاری دەکات، لایەنی شیعەش باڵادەست بووە بەسەر هەموو جومگە سەرەکییەکانی وڵاتدا.  

 

لێدوانی فەرمی: محەممەد ساحیب دەڕاجی، ڕاوێژکاری محەممەد شیاع سوودانی، سەرۆکوەزیرانی عێراق ڕایگەیاند: زیاتر لە 40%ـی وەزیرەکان بەهۆی خراپی ئەدای کارەکانیانەوە بارگرانییان لەسەر حکومەتی عێراق دروستکردووە.

 

- دەڕاجی ئاماژەی بەوەشکرد، نا کارامەیی ژمارەیەک وەزیر کاریگەریی نەرێنی لەسەر کارەکانی حکومەت هەبووە و کێشە و بەربەستەکانی زیاتر کردووە.

-  پێویستە پێکهێنانی حکومەتی داهاتوو لەسەر بنەمای زۆرینە و ئۆپۆزسیۆن بێت نەک پشک و ڕازیکردن.