ڕووسیا پڕۆژە بڕیارێکی ئەنجوومەنی ئاسایش لە دژی کۆریای باکوور ڤیتۆ دەکات

ئاڤا نیوز

ڕووسیا ڤیتۆی لە دژی پڕۆژە بڕیارێکی ئەنجوومەنی ئاسایشی نەتەوە یەکگرتووەکان، تایبەت بە کۆریای باکوور بەکارهێنا. 

وێنە گەورەکە: پڕۆژە بڕیارەکە لەلایەن ئەمریکاوە پاڵپشتی دەکرا و بە هۆیەوە داوا کرابوو کە ئەرکی پانێڵی شارەزایانی نەتەوە یەکگرتووەکان بۆ چاودێریی نێودەوڵەتی لە سەر سزاکانی سەر کۆریای باکوور، کە لە ساڵی 2006ەوە بەسەریدا سەپێنراون، درێژ بکرێتەوە. 

زانیاریی زیاتر: پێشتر ئەنجوومەنی ئاسایش ڕایگەیاندبوو لێکۆڵینەوە لەو ڕاپۆرتانە دەکات کە باس لە گوێزانەوەی چەک لە نێوان مۆسکۆ و پیۆنگ یانگ دەکەن.

بۆچوونی لایەنی بەرامبەر: ئەمریکا ئەم هەنگاوەی ڕووسیای بە "هەوڵێکی بەرژەواندیخوازانە" ناوبرد بەوەی دەیەوێت ڕێگە لە ئاشکرابوونی هاوکارییەکانی لەگەڵ کۆریای باکوور بگرێت. 

گۆشەیەكی دیكە: ئۆکراینا ڤیتۆی ڕووسیای بە "داننان بە تاوان" ناوبرد بەوەی ڕووسیا لەم ڕێگەوە ئەوەی ئاشکرا کردووە کە لە کۆریای باکوور چەک وەردەگرێت و لە دژی ئۆکراینا بەکاری دێنێت.  بەڵام چین نەچووە ڕیزی ڕووسیا و بڕیارەکەی ڤیتۆ نەکرد، هاوکات نەچوو ڕیزی ئەمریکا و دەنگی پێ نەدا، بەڵکو خۆی لە دنگدان پاراست. 

ئەوەی پێویستە بیزانیت: ئەرکی ئێستای ئەم پانێڵە لە کۆتایی مانگی نیسانی ئەمساڵدا تەواو دەبێت و بە هۆی ڤیتۆکەی ڕووسیاوە نوێ ناکرێتەوە.