سەرۆکوەزیران بارزانی: ڕێگەی گەشەپێدان بە زاخۆ و موسڵ و هەولێر تێنەپەڕێت پلانێکی هەڵەیە

ئاڤا نیوز

 

سەرۆكوەزیران بارزانی ڕایگەیاند، هەرێمی كوردستانیش وەكو بەشێك لە عێراق بەرژەوەندیی زۆری لەگەڵ توركیا هەیە، یەكێك لە هۆكارەكانی بەهێزی پەیوەندیی نێوانمان، ئارامیی هەرێمی كوردستانە.

 

وێنە گەورەکە: لە هەولێر سیمپۆزیومی نێودەوڵەتیی کاریگەرییەکانی وشکەساڵی و گۆڕانی ئاووهەوا لەسەر دۆخی سیاسی، ئابووری و دیموگرافیایی عێراق، بەڕێوەچوو و سەرۆکوەزیران بارزانی بەشداری پانێلێکی کرد.

 

لێدوانی فەرمی: سەرۆكوەزیران بارزانی ڕایگەیاند: "توركیا ئاوی بەدەستەوەیە و عێراق سەرچاوەی ژێرزەوی زۆری هەیە، هەردوولا دەتوانن دانووستانی لەسەر بكەن؛ ئەو تێڕوانینەی بۆ ڕێگەی گەشەپێدان هەمانە و بەو پێشنیازەی پێشكەشی بەغدامان كردووە، هێشتا نازانین بە چ جۆرێك دەبێت".

 

زانیاریی زیاتر: پێمان باشە ڕێگەکە لە زاخۆوە بۆ موسڵ و هەولێر، دواتر كەركووك و ئینجا بۆ بەغدا بڕوات، بۆیە ئەگەر بەو شێوەیە نەبێت، هۆكارەكە هەرچییەک بێت پلانێكی هەڵەیە.

 

باکگراوند: لە ساڵی 2022ـەوە ژێرخانی پڕۆژەی ڕێگەی گەشەپێدان لە نێوان عێراق و تورکیا و ئیمارات دانرا و پێشبینی دەکرێت چوار ساڵ تەواو بێت. ڕێگەکە هەزار و 200 کیلۆمەترە و لە جووتسایدێک و هێڵێکی ئاسن پێک دێت و بەندەری فاوی بەسڕە بە تورکیا دەبەستێتەوە. ساڵی 2028، دەست بە پڕۆژەکە دەکرێت.