ڕەشنووسی پڕۆژەی گۆڕینی ناسنامەی نەتەوەیی ئێزدییەکان ڕاگیرا

ئاڤا نیوز

نوێنه‌ری کوردانی ئێزدی له‌ وه‌زاره‌تی ئه‌وقاف و كاروباری ئایینی ڕایگەیاند، هیچ پەرلەمانێک بۆی نییە "ناسنامەی نەتەوەکان" بگۆڕێت، ڕەشنووسی پڕۆژەکەش لە پەرلەمان ڕاگیراوە.

وێنە گەورەکە: لە پەرلەمانی عێراق، واژۆی زیاتر لە 180 پەرلەمانتار کۆ کرایەوە بۆ ئەوەی پەرلەمان ناسنامەی نەتەوەیی کوردانی ئێزدی بگۆڕێت، ئەمەش کاردانەوە و نیگەرانی ئێزدییەکانی لێکەوتەوە.

لێدوانی فەرمی: سعوود مستۆ، نوێنه‌ری ئێزدییه‌كان له‌ وه‌زاره‌تی ئه‌وقاف و كاروباری ئایینیی‌ هه‌رێمی كوردستان بە ئاڤا نیوزی گوت: حکومەتەکانی پشێووی عێراق هەوڵیان داوە ناسنامەی نەتەوەیی کوردانی ئێزدی بگۆڕن، ئەمەی ئێستاش درێژەی ئەو هەوڵانەیە.

زانیاریی زیاتر: دەسەڵاتی گۆڕین یاخود دیاریکردنی نەتەوەی کۆمەڵگەیەک لە دەستووردایە نەک لەلایەن پەرلەمانەوە، بۆیە ئەم هەوڵە پێچەوانەی دستوور و یاسایە و هیچ پەرلەمانێک بۆی نییە ناسنامەی نەتەوەکان بگۆڕێت.

لە لایەکی دیکەوە: لە لایەن بەشێک لە میدیاکانەوە ڕاگەیێنراوێک بەناوی ئەنجوومەنی ڕۆحانی ئێزدییەوە بڵاو کرایە، لەوبارەیەوە سعوود مستۆ، گوتی: وێڕای ئەوەی ئەندامانی ئەنجوومەنەکە دژ بەو هەوڵەن، بەڵام هیچ ڕاگەیێنراوێکیان بڵاو نەکردووەتەوە.