چین فرۆشتنی مووشەکی ئەمریکی بە تایوان سەرکۆنە دەکات

ئاڤا نیوز

 

چین سەرکۆنەی فرۆشتنی مووشەکی ئەمریکی بە تایوان دەکات، بەیجینگ پڕۆسەکە بە زیانگەیاندن بە پەیوەندی نێوان ئەمریکا و چین ناوی دەبات و پێی وایە، دەبێتە مەترسی بۆ سەر ئاسایشی ناوچەکە.

 

ڕاگەیێنراوی فەرمی: وەزارەتی دەرەوەی چین ڕایگەیاند، فرۆشتنی مووشەکی دوورمەودا پێشێلکردنی سەروەری و بەرژەوەندییە ئەمنییەکانی چینە، زیانێکی زۆر بە پەیوەندییەکانی چین و ئەمریکا دەگەیێنێت و ئاشتی و سەقامگیری دەخاتە مەترسییەوە.

 

وێنە گەورەکە: ڕێککەوتنی فرۆشتنی مووشەکی ئەمریکا بە تایوان بە بڕی 1.16 ملیار دۆلار دەخەمڵێنرێت، ڕێککەوتنەکە گڵۆپی سەوزی کۆنگرێسی پێویستە. ناوەڕۆکی ڕێککەوتنەکە سیستمی دژە فڕۆکەی جۆراوجۆر لەخۆدەگرێت، لەوانە مووشەکی "ناسامس" و 123 مووشەکی دیکە. 

 

ئەوی پێویستە بیزانیت: لە ماوەکانی ڕابردوودا، بەیجینگ سزای بەسەر کۆمپانیاکانی وەزارەتی بەرگری ئەمریکا سەپاند. ئەمەش وەک کاردانەوەیەک بۆ ڕەزامەندی واشنتۆن بۆ فرۆشتنی کەرەستەی سەربازیی بە تایوان.